کابل ټکی کام (سه شنبه، ۸ غویی، ۱۴۰۵ل)
د ریاست الوزرا د اقتصادي مرستیال ملا عبدالغني برادر اخوند له لوري په فاریاب ولایت کې د یو میلیارد او ۱۲۰ میلیونه افغانیو په ارزښت د برېښنا درې مهمې پروژې پرانیستل شوې.
د ریاست الوزرا اقتصادي معاونیت په خبرپاڼه کې ویلي، په دغو پروژو کې له مرکزي سب سټېشن څخه تر بلچراغ او ګرزیوان ولسوالیو پورې د ۱۱۰ کیلوولټ برېښنا لین غځول، په بلچراغ ولسوالۍ کې د سب سټېشن جوړول او د ټرانسفارمرونو له لارې د برېښنا شبکې پراخول شامل دي.
د خبرپاڼې له مخې، د یادو پروژو مالي لګښت د اسلامي امارت له لوري ورکول کېږي او عملي چارې به یې د خصوصي سکټور له خوا په درېیو کلونو کې بشپړې شي.
