کابل ټکی کام ۱۹غويي/۱۳۹۵، احمدالله مهاجر
د سولې عالي شورا اعلان کړه، چې د سولې د وروستۍ هوکړې د لاسلیک لپاره حکمتیار کابل ته راځي.
د سولې عالي شورا مشاور محمد اسماعیل قاسمیار ویلي دي، چې حکمتیار به راتلونکې اونۍ ته د ولسمشر او د دغې شورا له مشر سید ګیلاني سره د سولې د وروستۍ هوکړې د لاسلیک لپاره کابل ته راشي.
په ورته وخت کې حکمتیار له حکومت څخه غوښتنه کړې ده، چې د سولې د تفاهمنامې د لاسلیک څخه مخکې باید د دغې ډلې ټول غړي له زندانونو څخه ازاد کړی شي، او د دغې ډلې د ټولو غړو نومونه له تور لست څخه وباسل شي.
همدا راز ګلبدین حکمتیار وړاندې له حکومت سره سوله د بهرنیو پر وتلو پورې موقوفه ګرځولې وه، خو دا مهال یې دریځ ډېر نرم کړی دی، او ویلي یې دي، چې بهرني ځواکونه به له افغانستان څخه راتلونکو پنځو کلونو کې وځي.
د یادولو ده، چې د پورتنیو شرطونو پر سر تراوسه پورې افغان حکومت او حزب اسلامي توافقنامه نهايي شوې نه ده.
