کابل ټکی کام ۱۹غبرګولي/۱۳۹۵، احمدالله مهاجر
د هلمند ولایت امنیه قومندان اقا نور کینتوز رسنیو ته وویل، چې په دغه ولایت کې د نیمایي پولیسو نومونه تش په پاڼو لیکل شوي دي، او معاشونه یې اخیستل کیږي.
کینتوز وویل، چې په هلمند ولایت کې د پولیسو تشکیل لس زره دی، خو له دې جملې څخه یوازې پنځه زره کار کوي، پاتې نیمایي یې نشته.
کینتوز چې دغه خبرې په هلمند کې یوې خبري غونډې ته کولې، د بېلګې په توګه یې د هلمند ولایت د مارجې ولسوالۍ د پولیسو تشکیل یاد کړ؛ ویې ویل، چې په دغه ولسوالۍ کې د پولیسو تشکیل ۴۵۰ دی، خو له دې جملې څخه ۱۵۰ حاضر دي، او نور نشته.
کینتوز نه هغه څوک یاد کړل، چې د خیالي پولیسو معاشونه یې جېبونو ته ځي، او نه یې هم د دومره زیاتو پولیسو د نشتوالي وجه بیان کړه.
ښاغلي کینتوز د خپلې وینا پر مهال وویل، چې په امنیتي ادارو کې د فساد سره د مبارزې په لړ کې ۲۸۰ پولیس له دندو شړل شوي دي، او ښایي سلګونه تنه نور هم وشړي.
نوموړي د دغو پولیسو د شړل کېدو وجه دا بیان کړه، چې دوی په خپلو دندو کې ناغیړي کوله، او یا د خاصو کړیو لپاره یې کار کاوو.
کینتوز خاصې کړۍ معرفي نه کړلې.
کینتوز دغه خبرې داسې مهال کوي، چې د روانې اونۍ په سر کې ولسمشر غني هلمند ولایت ته ولاړو، او امنیتي ارګانونو ته یې امر یې وکړو، تر څو په دغه ولایت کې د پولیسو په ادارو کې جدي اصلاحات راولي.
د سیاسي چارو کارپوهان د هلمند د امنیتي وضعې د خرابوالي یوه وجه همدا بولي، چې پولیس نشته، خو د کاغذ پر مخ یې نومونه شته، او د دوی په نوم معاشونه اخیستل کیږي.
د یادولو ده، هلمند ولایت چې دا مهال د نا امنو ولایتونو په قطار کې راځي، له ۱۴ ولسوالیو څخه پنځه ولسوالۍ د طالبانو په لاس کې دي، او د نورو ولسوالیو مرکزونه یوازې د دولتي ځواکونو په لاس کې دي.
