روسیې د سوریې په جګړه کې ملیاردونه ډالره ګټلي دي
کابل ټکی کام۱۳۹۵غبرګولی۲۰ عبدالهادي همت
د العالم خبري اژانس د راپور له مخې؛ له کله نه چې روسیې په سوریه کې بریدونه او عملیات پېل کړي دي، د دغه هېواد وسلو د نړېوالو پام ځانته را اړولی دی. سرچینه زیاتوي، چې په سوریه کې د روسیې عملیات د دغه هېواد وسلو ازمویلو ته یو طلايي چانس و، چې په نړېواله کچه یې مشهورې کړې.
راپورونو کې راغلي، چې روسیې په سوریه کې د عملیاتو له کبله ملیاردونه ډالره ګټه کړي دي.
یاد راپور د “دیر سټندرډ” ورځپاڼې هم ورکړی او ویلي یې دي، چې روسیې په سوریه کې د عملیاتو له پېل راهیسې د ۴۸ ملیارده ډالرو په ارزښت د خپلو وسلو د پلور قراردادونه لاسلیک کړي دي.
د یادونې وړ ده، چې روسي چارواکوهم دا خبره منلې او ویلي یې دي چې په دې وروستیو کې یې له وسلو تود هرکلی شوی او لامل یې په سوریه کې د ترهګرۍ په ځپلو کې بریا بلل شوې.
دا په داسې حال کې ده چې د بشري حقوقو نړیوالې ادارې په وار وار سره د روسيي پر بمباریو نیوکې کړي او ویلي یې دي چې په دغو بمبارونو کې یې زیات عام وګړي د ښځو او ماشومانو په شمول وژلي دي.
