کابل ټکی کام ۱۳۹۵ چنګاښ ۲۷ بصیراحمدپاڅون
پرون د ملي وحدت حکومت اشرف غني د تلیفون په کرښه د نوازشریف د روغتیا پوښته وکړه او د د ې ترڅنګ یې د پاکستاني طالبانو قوماندان عمر خالد د وژل کیدو په اړه هم مفصل معلومات ورکړل.
نوازشریف تیره میاشت د لندن په یو روغتون کې د زړه جراحي عملیات وکړل او پدې نږدې وروستیو خپل هیواد ته راستون شوی دی.
د پاکستان لومړي وزیر نوازشریف د پاکستاني طالب قوماندان عمرخالد د وژنې له امله له محمد اشرف غني مننه وکړه او ډاډ یې ورکړچې په شریکه به د تروریز د له منځه وړلو لپاره هلې ځلې کوي.
تیره اونۍ په افغانستان کې امریکایي ځواکونو ویلي و چې پاکستانی طالب قوماندان عمرخالد یې په ننګرهار کې د هوایي برید په ترڅ کې وژلی دی.
یو شمیر پاکستاني طالبان د افغانستان په غرنیو سیمو کې میشت دي او له هغه ځایه پر پاکستاني پوځیانو او نورو حکومتي اهدافو بریدونه تنظیموي. داسې ویل کیږي چې د افغانستان یو شمیر حکومتي کړۍ له دغو طالبانو سره اړیکې لري او د پاکستان پرخلاف یې جګړو ته هڅوي. خو د افغانستان حکومت دا ادعاوي ردوي.
درې کاله وړاندې د حکیم الله مسود مرستیال قاري لطیف مسود لوګر ته د افغانستان حکومت د مرستو جلبولو لپاره د لوګرد هغه وخت والي ارسلا جمال په غوښته تللی و چې د افغانستان حکومت د استخباراتو له موټره امریکایي پوځیانو ونیو او بیا تیر کال افغان حکومت پاکستاني حکومت ته لاس تړلی وسپاره، د افغانستان عام خلک د افغان حکومت د داسې کړنو څخه سخت ناراضه دي او داسې کارونه د افغانانو د ملمه پالنې په تاریخ تور او شرموونکي داغ ګڼي.
