کابل ټکی کام ۱۳۹۵ چنګاښ ۲۸ عبدالهادي همت
د کرنې او مالدارۍ وزير وايي د غنمو د توليد د زياتوالي لپاره يې بېلابېل پروګرامونه تر لاس لاندې نیولي دي او هيله من دى، چې تر پنځو کلونو پورې به افغانستان د غنمو له پلوه په ځان بسيا شي.
اسدالله ضمير يادې څرګندونې په کابل کې د کرنې د پراختيا، اوبو لګونې او مالدارۍ په برخو کې د دولسو پروژو له لاسليک وروسته له رسنيو سره په خبرو کې وکړې.
نوموړي وويل هوډ لري، چې د غنمو د توليد له پلوه د افغانستان اړتياوې له کورنيو توليداتو څخه پوره کړي:
د غنمو لپاره زموږ برنامه يوه پراخه او څو بعديزه برنامه ده، لنډه كه ووايم هم په دې برخه كې په تحقيقاتو كار كېږي او هم د غنمو د توليد د ودې په اړه، همدا راز يې د ضايعاتو د مخنيو لپاره هم كار كېږي، دا برنامې پنځه كلنې دي، خداى دې توفيق راكړي كه شرايط ښه وو افغانستان به د خپلو غنمو اړتياوې خپله پوره كوي.
اسدالله ضمير زياته كړه، د کرنې، اوبو لګونې او مالدارۍ وزارت هوډ لري، چې سږ کال له دېرش څخه تر پنځه دېرش زره جريبه پورې نوې ځمکې تر اوبو لاندې راولي او د کرنې وړ وګرځي.
