امریکايي چارواکي وايي، امریکا به په هلمند ولایت کې د خپلو مېشتو پوځیانو په غوښتنه دې ولایت ته یو شمېر نور پلي سمندري Marine سرتېري ولېږي.
امریکايي چارواکو ان بي سي نیوز ته ویلي، په هلمند ولایت کې د دېره امریکايي پوځیانو قوماندان، روجر ټونر دې ولایت ته د نورو مرین سرتېرو د لېږلو غوښتنه کړې ده، چې د امریکايي ځواکونو عمومي قوماندان جنرال جوزیف ووټل منلې ده.
ان بي سي نیوز د امریکايي چارواکو له خولې لیکلي، اضافي مرین سرتېري به – چې وړاندې لا په سیمه کې وو- په هلمند کې د امریکايي ځواکونو Task Force Southwest اډې ته ولېږل شي. په راپور کې نه دي ویل شوي چې د رالېږل کېدونکو پلیو سمندري ځواکونو شمېر به څومره وي.
څو اونۍ وړاندې په هلمند کې مېشتو امریکایي پوځیانو سي ان ان تلویزیوني چینل ته ویلي وو چې په سختو جګړو کې راګیر دي او هره شېبه له اورونو سره لوبې کوي. دغو ځواکونو یادې خبري شبکې ته ویلي وو چې کلونه مخکې یې هم په افغانستان کې ماموریت تر سره کړی دی؛ خو اوسنۍ جګړه د پخوانیو په پرتله څو برابره سخته ده.
هلمند د افغانستان تر ټولو ناامنه ولایت دی چې زیاتره برخې یې د طالبانو په لاس کې دي. اوس هم په دې ولایت کې افغان او بهرني ځواکونه له طالبانو سره په سختو جګړو کې ښکېل دي؛ خو تر دې دمه یې هيڅ پرمختګ نه دی کړی.
هلمند ته نور امریکايي سرتېري داسې مهال لېږل کېږي چې ټرمپ د خپلې ستراتیژۍ په جوړولو اخته دی. د افغانستان دفاع وزارت ویلي و چې د دوی ټولې هیلې د نوي امریکایي ولسمشر تر پالیسۍ پورې تړلې دي او ټول امیدونه یې د هغه هیواد نظامي مرستو ته دي.
