دمشرانو جرګې مرستیال: په حکومت کې دننه د ارګ د مخالفینو پر ضد باید پوځي عملیات وشي
که حکومت په دې برخه کې جدي چلند ونه کړي، نو ښایي په راتلونکي کې نور چارواکي هم د حکومت د پرېکړو پر وړاندې ورته چلند وکړي.
(کابل تکی کام ۱۳۹۶ سلواغه ۳۰ فرید افغان)
د مشرانو جرګې دوهم مرستیال رسنیو ته ویلي چې حکومت دې د هغو کسان پرضد هم عملیات وکړي چې یواځې دخبرو له لارې سیاسي مخالفت لري.
محمد اصف صدیقي د ازادۍ رادیو ته ویلي چې د ارګ مخالفین باغیان دي او باید وځپل شي.
له دې سره سره چې ګډحکومت د جانکري په منځګړتوب د یوې موافقتنامې ترمخه رامنځته شوی چې دواړه لوري نیم په نیمه واکونه لري او مخالفین هم د خپلو حقوقو غوښتونکي دي خو نوموړی بیا د هغوی ونډه غیر قانوني بولي او زیاتوي چې که حکومت په دې برخه کې جدي چلند ونه کړي، نو ښایي په راتلونکي کې نور چارواکي هم د حکومت د پرېکړو پر وړاندې ورته چلند وکړي.
دا په داسې حال مې ده چې تیره ورځ دسمنګانو والي عبدالکریم خدام د ارګ له خوا د لرې کولو پریکړه ناسمه وبلله او هغه یې رد کړه، چې په تعقیب یې نن دحکومت شریک واکمن ګوند (جمعیت اسلامي)هم د نوموړي ملاتړ اعلان کړ.
تر دې وړاندې هم ارګ د بلخ له والي سره د نوموړي په لرې کولو دوه میاشتې پرلپسې چنې ووهلې او لا هم نه دی بریالی شوی چې نوموړی له واکه وپرزوي.
باید وویل شي چې د سیمیزو ارګانونو خپلواکې ادارې هم ویلي چې له مخالفتونو سره سره به سبا د سمنګانو ولایت ته نوی والي ورمعرفي کوي، خو د هغه ولایت د والي ویاند بیا ګواښ کړی چې که حکومت پوځي مداخله وکړه له سخت غبرګون سره به مخ شي.
