پر جمعيت د ارګ دویم ډز
سرليکنه
ارګ تراوسه د بلخ له ولايتي څوکۍ د ګوښه کړي والي، عطا محمد نور، د پورته کولو توان نه دی پيدا کړی چې د پنځو واليانو په تبديلۍ کې یې د سمنګان والي، عبدالکريم خدام، تبديل نه، بلکې د ځونډي ګل زماني په څېر یې کورته لېږلی دی. په بله مانا، له دندې یې ګوښه کړی دى.
اوس د ارګ لخوا د جمعيت د ګوند بل غړى، د سمنګان والي، هم ګوښه کړل شو. که یې تبديل کړی واى، شايد خدام د ارګ پر خلاف د مخالفت او په ولايتي څوکۍ د پاتې کېدا غږ نه واى پورته کړى. خو دا چې ګوښه کړل شوی دى، د بلخ د والي عطا محمد نور په څېر یې ځان د ولايت پر څوکۍ پورې سريښ کړ.
تر اوسه پورې د جمعيت ګوند د بلخ د پخواني والي، عطا محمد نور، په اړه د ارګ په پرېکړه تصميم نه دى نيولى. که د جمعيت ګوند په خپلو کې څه سره غوټه کړي وي، مطبوعاتو ته نه دې راوتلي، ځکه عطا محمد نور له دوه مياشتو ځنډ وروسته بيا په بلخ کې د ولايت چارې پیل کړې او د ارګ لخوا نوي ټاکل شوي والي، داؤد، ته یې د کار اجازه ورنکړه.
د بلخ ولايت له څوکۍ د عطا محمد نور ګوښه کېدا د ارګ او جمعيت تر منځ ناندرۍ رابرسېره کړې، او آن امريکايي چارواکي، جان باس، هم د ارګ په پلوۍ مداخله پکې وکړه، ویې ويل چې بايد دا ستونزه د قانون له مخې (د ارګ پرېکړه) ومنل شي. خو نور تراوسه د جمعيت په ټينګار لا د بلخ والي دى.
د سمنګان ولايت له څوکۍ د خدام ګوښه کول پر جمعيت د بې واکۍ د ارګ، دویم ډز دى چې ویې وکړ. خو جمعيت تراوسه لا پر ارګ د خپلو پرېکړو خوله نه ده ورسمه کړې، يواځې د عطا نور په خوله اکتفا کوي: کله چې ارګ د نور پر خلاف سل لفظي ډزې وکړي، نور یې په يوه ډز ځواب ووايي، بيا ارګ د جګړې د تاکتيک له مخې غلی وي. تېره ورځ ارګ له يو څه ځند وروسته د خدام په ګوښه کولو دویم ډز وکړ.
دا به وروسته څرګنده شي چې په رښتيا د سمنګان ترکمنان د خدام پاتې کېدل غواړي او که عطا نور ورته پر څوکۍ د سرېښ کېدو وينا کړې ده. که پر جمعيت د ارګ دویم ډز هم پوچ شي، نور او خدام ښکار نه کړي، بيا خو ارګ ته هيڅ نه دي ورپاتې؛ يواځې د فرمانونو په ډزو نامشروع حکومت ته هم دوام نه شي ورکولاى.
تېره ورځ د جمهوري رياست پخواني معاون، يونس قانوني، په کابل کې ويلي چې د بلخ د والي غوښتنې په عدالت ولاړې دي، ”بايد ارګ ورته پاملرنه وکړي، ستونزه په سوله ييزه توګه حل کړي، که پاملرنه ونه کړي، هېواد به د يوه بل بحران په لوري روان شي او يوه انقلاب ته به زمينه برابره کړي. “
د قانوني، چې د بلخ د والي دريځ د افغان ولس حق بولي، له خبرو دا څرګندېږي چې جمعيت د ارګ د دویم ډز په مقابل کې انقلابي ډزو ته ځان آماده کوي.
دا مهال د جمعيت ګوند په دې اړه د خپل ګوند پله، په حکومت کې د يو شمېر کسانو په پلوۍ درنوي څو له ارګ سره د زورازمايۍ په ميدان کې خپل زور ارګ ته ښکاره کړي.
د جمعيت او ارګ او هم پخپله په ارګ کې اختلافات اوج ته رسېدلي دي. که د جمعيت او ارګ ترمنځ ستونزه په نږدې راتلونکې کې حل نه کړل شوه، داسې نښانې ليدل شوې چې امريکا به په افغانستان کې د نظام د بدلون په اړه بل نوی تصميم ونيسي، چې بیا به هم ارګ او هم جمعيت پر خپلو کړنو پښېمانه وي.
