د آلمان د دفاع وزیره په ناڅاپي توګه افغانستان ته رسیدلې
(کابل ټکی کام ۱۳۹۷ وری ۵ فرید افغان)
د جرمني د دفاع وزیره میرمن «اورزولا فون درلاین» نن د خپلو سرتیرو د لیدنې په خاطر د مزار شریف ښار ته تللې.
له نوموړې سره د خپل هیواد دپارلمان یو شمیر استازي هم ملتیا کوي او غواړي په بلخ کې له نږدې نه د خپلو ځواکونو سره لیده کاته وکړي.
د جرمني د ایتلافي حکومت له جوړیدو وروسته دا د میرمن فون افغانستان ته لومړی سفر دی چې تر دې وړاندې یې د کریسمس په مراسمو کې له افغانستان څخه لیدنه کړې وه.
په دې وروستیو کې د آلمان هیواد په افغانستان کې د خپلو ځواکونو د زیاتوالي خبر هم ورکړی او تر څنګ یې خپل پوځي ماموریت هم د ۲۰۱۹ کال تر پایه تمدید کړی دی.
فون به د خپلو سرتیرو د زیاتوالي سربیره خپلو ځواکونو ته د مخ پر وړاندې تهدیدونو څیړنه هم وکړي.
د دې هیواد ځواکونه د هیواد په شمال د بلخ په ولایت کې پوځي اډه لري، چې اوس به د نویو ځواکونو د زیاتولو سره
په کندوز او د پروان په بګرام پوځي اډه کې هم میشت شي.
الماني ځواکونو اوس د دې اجازه هم تر لاسه کړې چې په بیړنیو حالاتو او د جرمني مؤسسو د امنیت ساتنې په برخه کې کار وکړي.
المان په افغانستان کې په پوځي او نورو برخو کې ۹،۷ میلیارده یورو لګولي او اټکل کیږي چې تر دې وروسته به یې د ځواکونو لګښتونه په کلنۍ توګه ۳ میلیارده یورو ته ورسیږي.
باید وویل شي چې،په افغان جګړه کې تر اوسه ۵۶ الماني ځواکونه وژل شوي دي.
