(کابل ټکی کام ۱۳۹۷ غبرګولی ۶)
د پاکستان پېښور او اړوند سیمو کې نن د جمعیت علماء اسلام مولانا فضل الرحمن ګوند پلويانو پراخې مظاهرې ایستلې وې، د دې ګوند پلويانو او د قبايلي سيمي يو شمېر ټولنو او مشرانو د خیبر پښتونخوا اسمبلۍ مخې ته احتجاجي مظاهره کړې ده او دوی وویل چې د یکشنبې په ورځ له اسمبلۍ څخه د فاټا اصلاحاتو بل منظوري ته نه پرېږدي.
لسګونو مظاهره چیانو اسمبلۍ ته تلونکی سړک تړلی او ټایرونه يې سوځولي دي. دوی د قبایلي سیمو په خېبر پښتونخوا کې د ورګډولو مخالفت کوي. مظاهره چیانو په خیبر پښتونخوا د قبایلي سیمو د ورګډولو ضد نعرې ووهلې. مظاهره کوونکي وایي له هر ډول بدلون مخکې دې په قبایلي سیمو کې د ولس رایه واخیستل شي.
په سیمه کې ګڼ شمیر پولیس ځای پر ځای شوي. مظاهره کوونکو په پولیسو کاڼي اورولي چې په غبرګون کې پولیسو اوښکې بهوونکی ګیس شندلی او د تاوتریخوالي پېښې هم شوې دي.
په دې مظاهره چیانو کې د جمعيت علمای اسلام (فصل رحمن ګوند)، فاټا ګرينډ الاینس، د فاټا د ځوانانو جرګې غړي او یو شمېر قبایلي مشرانو ګډون کړی وو. ناویلې دې نه وي پاته چې جمعیت علماء اسلام فضل الرحمن ګوند یواځنی هغه ستر ګوند دی چې خیبر پښتونخوا سره د فاټا ګډولو پرېکړې مخالفت کوي او پر خلاف یې مظاهرې کوي.
