روژه نیول الهي امر دی او پر هر بالغ نارینه او ښځینه مسلمان فرض شوې ده. روژه په کال یو ځل راځي؛ خو دغه ۳۰ او یا ۲۹ ورځې یوازې د الله جل جلاله ورځې دي. مسلمانان باید په دغه ورځو کې یوازې د الله جل جلاله عبادت وکړي، د خپلو کړیو گناهونو بښنه وغواړي او د ټول مسلمه امت لهپاره د خیر دعاوې وکړي. روژه الهي امر دی او موږ مسلمانان روژه نیسو؛ خو ځینې روغتیايي گټې هم لري، چې په لوستلو به یې تاسې هم حیران شئ.
دلته د روژې په ځینو کمو گټو درته غږېږو، گنې د روژې گټې اوسني ساینس هم ثابتې کړي او ځینې کافر روغتیا پالان هم د خپلې روغتیا د سلامتۍ لهپاره روژه نیسي.
۱: روژه کې مو بد عادتونه له منځه ځي
روژه د عبادت او اطاعت میاشت ده او په ۳۰ ورځو کې موږ کولی شي، چې خپل بد عادتونه پرېږدو. ځینې خلک په نشهيي توکو روږدي دي او کولی شي په دغه میاشت کې له نشې ځانونه خلاص کړي؛ ځکه په روژه کې د ورځې خوراک او څښاک نه کوو او نشهیان کولی شي د ۳۰ ورځو په اوږدو کې ځانونه له نشو خلاص کړي. که چېرې نشهيي توکو کارول پرېږدي نو ډېر گټې به هم وکړي.
۲: اشتهاء مو برابرېږي
د روژې په میاشت کې کم خواړه خوړل د دې سبب گرځي، چې ستاسې معده کوچنۍ شي او د ډېر خوراک څخه مو وژغوري.
ډېر خوراک په معده بوج راوړي او د خولې خوند مو تل در خرابوي. هڅه وکړئ چې په روژه کې کم خواړه وخورئ او خپلې اشتهاوې برابرې کړئ.
ډېر خوراک کول مو له وخت مخکې زړوي او له معدې مو هم خلاصوي. لږ خواړه خوړل ستاسې د روغتیا سبب گرځي.
۳: معده مو فعالېږي
د کال یوولس میاشتې موږ مسلسل خوراک کوو، نو د همدې له امله زموږ پر معدو ډېر بوج وي. د روژې په برکت سره زموږ معدې هم فعاله کېږي او د غذايي موادو ښه جذب کولی شي. د روژې د نیولو له امله اډیپونکتین هورمون زیاتېږي، چې د مېتابولېزم او د وازدو په ویلي کولو کې مهمه ونډه لري. اضافي وازدې او چاغښت د انسان ظاهري څېره هم بدرنگه کوي او ډېر ژر یې د مرگ کومي ته ورټېله کوي.
۴: د بدن د دفاع سیستم مو پیاوړی کېږي
په روژه کې مو بدن کمزوری کېږي نه، بلکې بدن مو لا پیاوړی کېږي. اوسنۍ سیانسي څېړنې وايي، چې په کال کې د یوې میاشتې روژې نیول زرگونه روغتیايي گټې لري. که تاسې څو ساعته خوراک او څښاک ونه کړئ، نو دغه حالت په بدن کې د نویو سلولونو د تولید سبب گرځي، چې وینه مو خوځنده کوي او بدن مو ورسره پیاوړی کېږي. د ویني جریان مو چټک کېږي او د بدن هر ځای ته مو وینه په اسانۍ رسېدلی شي.
۵: د بدن وازدې مو ویلي کېږي
په روژه کې له سهاره تر ماښامه خوراک او څښاک نه کېږي، نو په همدغه موده کې د بدن اضافي وازدې ویلي کېږي، چې انسان ورسره چالاکه کېږي او اضافي بار ترې کمېږي. چاغښت د ټولو ناروغیو سبب دی او باید خپل وزن د خپل عمر په تناسب وساتو او وزن ډېرېدو ته پرېنږدو.
