( کابل ټکی کام ۱۳۹۷ غبرګولی ۱۵)
د کابل د غونډې څو تنو علماؤ کابل ټکي کام ته ویلي چې په غونډه کې له څو تنو پرته نور هیڅ عالم د یادې غونډې له موضوع نه و خبر او هغوی یې په نورو موضوعاتو وربللي.
دوی زیاتوي “موږ ته ویل شوی ؤ چې دحج اوقاف وزیر او څه بهرني علماء دنظر د تبادل لپاره غواړي له علماؤ سره خبرې وکړي ، موږ هیڅ په موضوع ونه پوهول شو یواځې څو کسان راغلل او په څوکیو کښیناستل او د روانې جګړې اړوند یې خبرې شروع کړې.“
علماء وایي؛ د سولې او جګړې له خبرو سره سم په غونډه کې شور او ځوګ پیل شو او به خبره یې چې “ د جلسې مشرانو پر مونږ ځینې ورقې وویشلې او د جګړې د پایښت په تړاو یې زمونږ د نظرونو اخیستلو غوښتنه وکړه، ټولو ورته د امریکایي اشغالګرو د وتلو وړاندیز وکړ، چې زمونږ ډیری ملګري په همدې ټکي تحدید او یو شمیر هم ونیول شول ،موږ لا ورقې نه وې تحویل کړې چې پریکړه اعلان او امریکایانو ته یو مخیزه برائت ورکړل شو“
علماء وایي؛ په پریکړه لیک کې د طالبانو د روانې مبارزې د حرمت او د سرتیرو بریدونو د ناروا والي خبرې هیڅ اساس نه لري او نه هم ګډونوالو ویلې دي.
دا په داسې حال کې چې تر دې وړاندې د سولې شورا په انګړ کې هم ورته غونډه د علماؤ په غولولو وربلل شوې وه او هغه څه چې علماؤ یې وړاندیز کړی و، په چورلټ ډول معکوس ابلاغ شول چې بیا علماؤ وروسته له رسنیو سره د غونډې په اړه خپل مالومات شریک کړل.
طالبانو د امریکایي جنرال نیکولسن د هغه اقرار په استناد چې ورته غونډې یې د امریکایانو ابتکار بللې، ویلي، دا غونډه هم د امریکایانو په غوښتنه رابلل شوې او هدف یې د روانې جهادي مبارزې پیکه کول و ، چې د دوی په خبره دا غونډه سوچه امریکایي او نمایشي پروژه وه.
