(کابل ټکی کام، ۱۳۹۷، غبرګولی ۱۵) د مشرانو جرګې سناتوران وايي، راتلونکې ټاکنې به له پراخو درغليو ډکې او يواځې د دوو ډلو تر منځ چې ارګ او سپيدار ماڼۍ دي ترسره کېږي.
د مشرانو جرګې غړی رحمت الله اڅکزی وايي، دا ځل ټاکنې يواځې د اجرائيه مشر عبدالله او ډاکټرغني تر منځ کېږي زياتوي ښايي يوه نيمه چوکۍ پکې حکمتيار ته هم ورکړل شي.
د اڅکزي په خبره، د ولسي جرګې څوکۍ سر اوسه وېشل شوي او يواځې هغه نوماند بريالی کېدلی شي چې د دواړو غاړو څخه له يوه سره يې معامله کړې وي ځکه راتلونکې ټاکنې به له پراخو درغليو ډکې وي او ازاد نوماند دې د بريا خوبونه نه ګوري.
د سناتورانو په وينا، په ټاکنو کې د درغليو ستر لامل د جعلي پېژندپاڼو ويشل دي چې حکومت او ډيری څارونکي بنسټونه پرې خبر دي خو هيڅوک يې د مخنيوي لپاره اقدام نه کوي.
سناتورانو راتلونکې ټاکنې له درغليو ډکې او د تاریخ تر ټولو غير شفافې ټاکنې وبللې زياتوي چې سر له اوسه په ټاکنو کې اويا سلنه درغلۍ روانې دي.
