د امریکا له کالیفورنیا ایالته خپرېدونکې ورځپاڼې Orange County Register، د اګست په ۶مه، په خپله سرمقاله کې لیکلي چې امریکا باید له طالبانو سره په مخامخ خبرو د افغانستان جګړه پای ته ورسوي او په دې توګه د امریکایانو سرونه او خزانه په دې ”بې ګټې“ جګړه کې له لګېدو وساتي.
اورنج کاونټي رجسټر ورځپاڼې په خپله سرلیکنه کې د رپورټونو په حواله ویلي چې د ټرمپ ادارې خپلو ډيپلوماټانو ته له طالبانو سره د مخامخ خبرو پیلولو امر کړی.
د ورځپاڼې په اند، ”دا په افغانستان کې د یوې بې ګټې جګړې د پای ته رسولو پر لور یو مهم ګام دی.“
دې ورځپاڼې د امریکا د واشنګټن پوسټ او نیویارک ټایمز رسنیو وروستیو راپورونو ته هم اشاره کړې چې پکې ویل شوي طالبانو او امریکايي ډيپلوماټانو تېره میاشت قطر کې یوه ابتدايي لیدنه کړې ده.
د ورځپاڼې په خبره، که څه هم د دې ډول د خبرو د پایلو په اړه به څه ویل له وخته مخکې خبره وي، خو له طالبانو سره په خبرو کې بوختېدل د افغانستان د جګړې د پای ته رسولو پر لور یو مهم پرمختګ دی.
د ورځپاڼې په وینا، د خبرو پر ځای جګړه تل بې ګټې ثابته شوې ده. ”د داسې خبرو بدیل – د دې موضوع د ډيپلوماټیک حل، او یا د هر ډول حل، له هیلې پرته دایمي جګړه – ثابته کړې چې داسې هڅه مرګونې، قیمتي او بې ګټې ده.“
د ورځپاڼې په اند، امریکا له ۱۷ کلونو راهیسې په افغانستان کې ښکېله ده خو د خپلو لاسته راوړنو د ښوولو لپاره څه نه لري. ”آن هغه مفکوره چې وايي امریکا افغانستان د ترورستانو له یو ځل بیا ”پټنځای“ کېدو ساتي هم په دې خبره تر پوهېدو وروسته له منځه ځي چې افغانستان اوس هم د داسې ډلو پټنځای دی چې امریکا ته زیان رسول غواړي.“
ورځپاڼې د داسې ډلو مثال داعش ښوولی،”چې د ’تروریزم پر ضد‘ د امریکا د خیالي جګړې د پیل پر مهال نه وه، خو اوس د افغانستان په ګډون د نړۍ په ځینو هېوادونو کې فعاله ده.“
ورځپاڼه وايي، ولسمشر ټرمپ په وار وار په منځني ختیځ او افغانستان کې د امریکا پر جګړو نیوکه کړې ده. په تېره اپرېل میاشت کې، سناتور رانډ پاول واشنګټن پوسټ ته وویل چې ولسمشر د افغانستان د جګړې ختمولو وعده ورسره کړې ده: ”ټرمپ په وار وار په مجلسونو کې ما ته ویلي چې موږ له دې دوزخه راوځو.“
دې ورځپاڼې په سرلیکنه کې زیاته کړې، که ټرمپ د افغانستان د جګړې د پای ته رسولو لپاره ګام واخلي، ”دا به د ستاینې وړ یوه داسې لاسته راوړنه وي چې د امریکایانو سرونه او د ماليه ورکوونکو پیسې به له بېځایه لګېدو وژغوري.“
ورځپاڼې خپله سرلیکنه په دې جمله ختمه کړې: څومره ژر چې دا جګړه پای ته رسېږي، هغومره ښه ده.
