د امريکا د استخباراتي ادارې سي آى اې تګلاره دا ده چې پينځه کاله وروسته بايد يا کوم هېواد د بل ښکرور هېواد له اشغال څخه خلاص او د ځان تابع کړي او يا په همدې کلونو کې په يو بې وزله هېواد يرغل وکړي. د تيرو ٧٥ کلونو راهيسې همدا جګړه ييزه او اشغالي لوبه روانه ده، چې ځنې هېوادونه امريکا په پوځي، اقتصادي، فرهنګي، کلتوري، اختلافي او عقيدوي لحاظ اشغال کړي او ځنې يې بيا په پوځي اشغال سره په هر اړخيزه توګه د ځان تابع کړي دي، چې د نورو هېوادونو تر څنګ افغانستان او عراق يې ژوندي مثالونه دي.
د ويتنام له ناکامې جګړې وروسته امريکا د اسلامي نړۍ پر خلاف لومړی استخباراتي او ورپسې پوځي يرغل ته زمېنې برابرې کړې دي، چې دا مهال د عربي هېوادونو په شمول په ١١ اسلامي هېوادونو کې د امريکا استخباراتي فعاليتونه روان دي، خو د ١٣٥٨هـ راهيسې ېې د ايران پر خلاف هلې ځلې زياتې کړې دي.
که څه هم امريکا په يمن، سوډان، اذربايجان، سوريه، پاکستان، افغانستان او ترکيه کې د خپلې وسې او قوت پورې هلې ځلې وکړې او کوي يې، چې د خپلو پلانونو له مخې په خپلو هلو ځلو کې د کاميابۍ درشل ته نه ده رسيدلې، خو د رسيدو لپاره له هر ډول مالي، قرهنګي، سياسي، اقتصادي او پوځي لارو کار اخلي، چې د پينځو کالو راهيسې يې د ايران پر خلاف خپلې هلې ځلې زياتې کړې او آن اسرائيل يې پر ايران د بريد لپاره هڅولي دي.
امريکا له ايران سره د پنځو هېوادونو د اتومي موافقې وروسته، چې ټرمپ ترې انکار وکړ، د عربي هېوادونو تر څنګ ېې نورو اسلامي هېوادونو ته، په ځانګړې توګه منځنۍ اسيا ته، خپل لاسونه اوږده کړي. لومړى يې پر ايران د اقتصادي بنديزونو خوله ولګوله او له ورسره کړې موافقې سره سره يې پر ايران د اقتصادي بنديزونو غږ پورته کړ، څو ايران د امريکا په مقابل کې سرټيټی کړي.
پر ايران له اقتصادي بنيديزونو څخه د ټرمپ او سي آى اې موخه يواځې د ايران کمزوري کول نه دي، بلکې غواړي اسلامي نړۍ او منځنۍ اسيا د خپل ځان تابع او په هر اړخيزه توګه يې اشغال کړي. د چين او روسيې په مقابل کې د منځۍ اسيا له سياستونو سره توپيري چلند يې جوت مثالونه دي.
اوس چې ټرمپ د ايران په مقابل کې کومه پاليسي يا تګلاره غوره کړې ده، دا تګلاره ايران او امريکا سره په جګړه اخته کولاى شي، خو د ايران او امريکا تر منځ د احتمالي جګړې د رامنځ ته کيدا په پاليسي کې ټرمپ بيا دوه مخيزه پاليسې غوره کړې ده، هم د ايراني چارواکو سره خبرې کول غواړي او هم پر ايران د بريد ګواښونه کوي، چې د همدې دوه مخې پاليسي له امله يې ايراني چارواکي له خبرو څخه انکاري کړي دي.
سپينه ماڼۍ که هر څو د ايران پر خلاف اقتصادي او د يپلوماتيک فشارونه زيات کړي، هغه پايلې چې ټرمپ يا سي آى اې ورته تمه لري، لاس ته يې نه شي راوړاى. امريکا که هر څو د ايران پر خلاف اقتصادي بنديزونه ولګوي، بيا هم بې د نرمې ديپلوماتيکي لارې له خپلولو چاره نه لري. که هر څو خپله سر زوري وکړي، بيا به هم ايران سره ديپلوماتيکي لارې ته کښينې.
په افغانستان، عراق او سوريه کې چې امريکا ته څه ستونزې پيښې دي، د ټرمپ سياسي مخالفين يې د ده له امله ګڼي. لکه د بلټن د وخت د بهرنيو چارو وزيره «ميډلين البرايت»، د کانګرس پخوانى غړى «لي هميلتن» او د ملي امنيت پخوانى مشر «جيمز کلاپر» تل پر ټرمپ نيوکې کوي، وايي امريکا يې په سيمه کې د زوال پر لورې روانه کړې ده او که د ايران سره په جګړه واوړي، دا به په افغانستان کې د امريکا له زوال سره مرسته وي.
د امريکا جمهور رييس يا سي آى اى چې د اسلامي هېوادونو او په دې وروستيو کې د ايران پر خلاف کومه پاليسي غوره کړې ده، که پرې عمل وکړي، دا به د امريکا لپاره په زوال تمامه شي. ټرمپ غواړي چې پر ايران اقتصادي بنديزونو سره به ايراني ولس وويشل شي، خو د افغان ولس له مقاومته ايراني ولس هم رنګ اخستی او مقابلې ته یې ځان چمنتو کړی دى، له دې امله به د امريکا لپاره په يوه موزه کې دوه پښې ننويستل ډير ګران تمام شي.
امريکا د دې لپاره چې ايراني ولس ايل کړي، رواني جګړه پېل کړې ده، خو لکه څرنګه چې د امريکا په خلاف له ايران اتومي تړون کوونکو هيوادونو د ټرمپ له نوې تګلارې مخ واړاوه او ايران سره يې په کړو ژمنو د پاتې کيدا ټنګار وکړ، دا ډول به امريکا د ايران سره په احتمالي جګړه واوړي او نږدې ياران هېوادونه به ترې مخ واړوي او امريکا به د ايران زور ته يوازې پرېږدي.
ايراني چارواکي هم په دې خبره يقين لري؛ ځکه خو د دې هيواد د قدس ځواکونو مشر تورن جرال قاسم سليماني په هغه مرکه کې چې امريکايي رسنيو رااخستې وه، ويلي و چې: که امريکا پر ايران جګړه پېل کړي، ايران به يې د امريکا په له منځه وړلو پای ته ورسوي.
