کابل ټکی کام (چهارشنبه ، ۱۲ چنګاښ ، ۱۳۹۸ل)
دکونړ ولایت سمییزو چارواکو خبر ورکړی چې ددې ولایت یوشمېر داعشي جنګیالي له ځینو سپکو او درنو وسلو سره یو ځای دولتي لوري ته پناه وړې، او له جګړو لاس په سر شوې.
د دې ولایت امنیه قومندان شفیع الله ددې ډلې د تسلیمۍ پخلی کړی اوزیاته کړې یې ده، نن سهار د پولیسو دځانګړو هڅو په اساس د قومندان عبدالقیوم زنداني په مشرۍ د داعش څوارلس کسیزې ډلې د جنګ جګړو لاس واخیست او له دولت سره یوځای شول.
د کونړ والي عبدالستار میرزکوال ددغې ډلې په تسلیمۍ خوښ دی، نوموړی زیاتوي، دغې وسله والې ډلې د دولت حقانیت په درک کولو سره تاو تریخوالی پرېښود او سوله ییز ژوند یې غوره کړ.
داپه داسې حال کې ده چې په دې وروستیو کې وسله والو طالبانو په دې ولایت کې دداعش خلاف سختې جګړې وکړې چې ډېری سیمې یې له دې ډلې تصفیه کړې او درانده تلفات یې ور واړول.
تردې وړاندې هم لسګونه داعشیان دفاریاب په درزاب او دکونړ په یوشمېر ولسوالیو کې ددولتي الوتکو پرمټ دتسلیمۍ په بهانه دطالبانو له محاصرې خلاص کړی شول، داهماغه دخلاصون لړۍ ده چې دتسلیمۍ نام ورکول کېږي.
