کابل ټکی کام (دوشنبه ، ۱۷ چنګاښ ، ۱۳۹۸ل)
دوحه کې د طالبانو، سیاست والو او مدني فعالانو ترمنځ دوه ورځنۍ بین الافغاني ناسته نن دوشنبه پای ته ورسېده.
ټاکل شوې ده چې څو شېبو کې به د دې ناستې یوه ګډه اعلامیه هم خپره شي.
له دوحې څخه راپورونه وایي چې ښکېلو اړخونو په ځینو موضوعاتو له اختلاف سره سره د یو بل خبرو او نظرونو ته غوږ نیولی او ځینو هوکړو ته هم سره رسېدلي دي.
په دې ناسته کې متین بېګ، نادر نادري او شهرزاد اکبر هغه درې کسان وو چې دا مهال په افغان حکومت کې دندې لري، خو دوحه کې یې د افغان حکومت استازولي نه کوله.
د طالبانو په استازیتوب هم ګڼو کسانو په دې ناسته کې ګډون کړی و.
دا ناسته د جرمني او قطر هېوادونو په ګډ کوربتوب جوړه شوې وه او د افغانانو د خپلمنځي خبرو په لړ کې درېیمه ناسته وه.
ددې ناستې له اختتام وروسته ټاکل شوې چې سبا سه شنبه یوځل بیا طالب اوامریکایي پلاوی داووم پړاو مذاکراتو دتکمیل په پار سره جرګه شي.
تمه ده چې دا پړاو مثبت او ځینې ښکاره توافقات هم له ځانه سره ولري.
