کابل ټکی کام(دوشنبه، ۱۷چنګاش، ۱۳۹۸)
د افغان سولې لپاره د امریکا ځانګړی استازی او له طالبانو سره د خبرو پر مهال د امریکایي ټیم مشر زلمي خلیلزاد ویلي، چې هوکړې ته ډیره لږ فاصله پاتې ده.
نوموړي له بي بي سي سره په مرکه کې ویلي چې له طالبانو سره په خبرو کې ډیر زیات پرمختګ راغلی خو د تل په څېر یې په مشخص ډول ونه ویل چې څنګه او په کومو برخو کې پرمختګ راغلی دی.
د ده په وینا چې دوه، درې ټکي لا پاتې دي چې موافقه نه ده پرې شوې چې په وینا یې په راتلونکي کې به بحث پرې وشي.
خلیلزاد دا خبرې داسې مهال کوي چې د طالب مذاکراتي ټیم غړي هم د زیات پرمختګ خبر ورکوي او وایي چې ۹۰ سلنه پرمختګ شوی دی.
ټاکل شوې ده، سبا ته یو ځل بیا دواړه خواوې د اووم پړاو مذاکراتو دریدلی راونډ پیل کړي.
د یادونې وړ ده چې په دوحه کې د بین الافغاني مجلس له کبله د امریکا او طالبانو اووم پړاو خبرې دوه ورځې درېدلې وې.
