کابل ټکی کام (شنبه ، ۵ زمری ، ۱۳۹۸ل)
دګډ دولت مشردولتي ادارو کې د ښځو د جنسي ځورونې له راپورونو وروسته ددې ادعاوو د څېړلو په پار ځانګړی سکرتریت رامنځ ته کړ.
د ولسمشرۍ ماڼۍ له مطبوعاتي دفتره په خپره شوې خبرپاڼه کې راغلي، چې ولسمشر د یوه فرمان له لارې د بشري حقونو په خپلواک کمیسیون کې ددغه سکرتریت د رامنځ ته کېدو امر کړی دی.
دغه سکرتریت ته دنده سپارل شوې چې په درېیو میاشتو کې د ننه د جنسي ځورونې ټولې ادعاوې و ارزوي، مستندې یې کړي، له قرباني شوو سره له نږدې وګوري، ددوی شکایتونه واوري، د اړتیا په صورت کې متهمین لویې څارنوالۍ ته وسپاري او ولسمشر ته خپل کاري راپور وړاندې کړي.
حکومتي ادارو ته هم دنده سپارل شوې چې د جنسي ځورونو په مواردو کې د ارزونې پر مهال له دغه سکرتریت سره بشپړه همکاري وکړي.
حکومت مشر وروسته له دې دغه کار کړی، چې په دې وروستیو کې یو شمېر رسنیو په ارګ او ځینو وزارتونو کې د ښځو د جنسي ځورونې په اړه راپورونه خپاره کړل.
ددغو ادعاوو په بهیر کې دولسمشر ستر سلاکار جنرال حبیب الله احمدزي هم ارګ تورن کړی وو چې لوړ پوړي چارواکي له مېرمنو څخه دځینو دندو په بدل کې جنسي غوښتنې کوي، دغه راپورونه په ټولنیزو رسنیو کې د کاروونکو له توند غبرګون سره مخ شوي وو.
