(کابل ټکی کام، ۱۳۹۸، زمری ۶)
د افغانستان سولې لپاره د امريکا د بهرنيو چارو وزارت ځانګړی استازی وايي، چې د افغانانو تر منځ خپلمنځي ناسته به د امریکا او طالبانو تر هوکړې وروسته ترسره کيږي.
خليلزاد په خپله رسمي ټويټرپاڼه ليکلی، په کابل کې د بین الافغاني مذاکراتو په اړه ګونګوسې روانې دي زياتوي په دې اړه يې وضاحت دا دی چې “دا مذاکرات به زموږ د توافقاتو د ترلاسه کېدو وروسته ترسره شي”.
د خليلزاد په خبره، بين الافغاني مذاکرات به د طالبانو او یوه ټول شموله ملي ټيم چې د حکومت له لوړپوړو چارواکو، د ګوندونو، مدني ټولنو او د ښځو له استازو څخه به تشکيل شوی وي، وشي.
طالبانو تر دې مخکې په خپلو اعلاميو کې د کابل اداره ګوډاګۍ بللې او د بهرنيانو په شتون کې يې له هغوی سره خبرې بې ګټې بللي دي.
د سولې چارو وزارت پرون په یوه اعلاميه کې وويل، چې طالبانو سره به تر راتلونکو دوو اوونيو پورې خبرې پيل شي.
په اعلاميه کې راغلي چې دا مهال د سولې چارو کې د دولت وزارت له ښکېلو اړخونو سره د پنځلس کسيز پلاوي په ټاکلو کې مشورې پیل کړي او دا مهال د خبرې کوونکي پنځلس کسيز ټيم نوملړ په نهايي کيدو دی.
