کابل ټکی کام (شنبه ، ۱۹ زمری ، ۱۳۹۸ل)
د افغان قضیې دحل لپاره د امریکا د بهرنیو چارو وزارت ځانګړی استازی زلمی خلیلزاد المان ته تللی دی او په برلین کې یې د المان د بهرنیو چارو له وزیر سره کتلي دي.
هیکو ماس له خلیلزاد سره په دې لیدنه کې ویلي چې دوی د بین الافغاني مذاکراتو ملاتړ کوي او په دې برخه کې هر ډول همکارۍ ته تیار دي.
خلیلزاد ویلي د جرمني د ملاتړ ژمنه یې ترلاسه کړې ده او دی به په دې برخه کې خپلو نورو هڅو ته ادامه ورکوي ترڅو افغانستان دیوې دایمي امن کور شي.
زلمي خلیلزاد د افغان سولې په تړاو له طالبانو سره د مذاکراتو پر مهال ځینې هېوادونو ته هم سفرونه کړي دي. دی هند ته لاړ او اوس په اروپا کې دی.
خلیلزاد وايي غواړي په دې توګه د افغان سولې په اړه نړیوال ملاتړ پیاوړی کړی چې دنړیوالو دتضمین په ترڅ کې دا بهیر نهایي کړل شي.
د طالبانو او امریکا ترمنځ اتم پړاو مذاکرات لاهم روان دي او تمه کېږي چې تر اختر وروسته هم ادامه پیدا کړي او ددې ونۍ تر پایه د دواړو لوریو ترمنځ هوکړه لاسلیک شي.
