کابل ټکی کام (سه شنبه ، ۵ وږی ، ۱۳۹۸ل)
امریکايي سیاسي مبصر وایي، کلونه کېږي چي امریکا په افغانستان کي جنګ سوکه سوکه بایلي، همدا اوس چي موږ هلته څورلس زره عسکر لرو، او هاغه وخت چې لکونه عسکر مو لرل؛ جنګ مو بایللی و.
لیکوال کاږي امریکا د عسکرو د شمېر او یا تکتیکونو په خاطر جنګ نه بایلي، بلکي زموږ مطلقه ناکامي پدې کي ده چي موږ د جنګ لپاره واقعي اهداف نه لرو. موږ په اول سر کي د تروریزم پر ضد کامیابه وو، خو وروسته مو د ځان لپاره داسي لوړ او غیر واقعي اهداف وټاکل چي تر لاسه کول يې ناممکن و.
بلانک زیاتوي، په افغانستان کې زموږ دوامداره نظامي حضور زموږ انساني او مالي تاوانونه نه سي توجیه کولای، موږ باید یوه موافقه تر لاسه کړو، او له افغانستانه ژر تر ژره راووزو، ځکه په بل صورت کي زموږ ځنډ زموږ لپاره لا قیمتي تمامېږي.
بلانک په خپله مقاله کې دحکومت او امریکایانو وارخطایۍ ته اشاره کوي او وایي، ښکاره خبره ده چي د طالبانو سره یوه موافقه به ډېر حکومتي چارواکي او امریکایان خوابدي کړي، خو فعلا همدا تر ټولو ښه لاره ده.
لیکوال دامریکا تېروتنې ته ګوته نیسي او لیکي، واشنګټن کولای سوای چي تر نن پنځه کاله پخوا بهتره موافقه تر لاسه کړي، حتی لس کاله پخوا يې تر هغه لا ښه موافقه تر لاسه کولای سوای، په ۲۰۰۲ کي خو يې تر ټولو ښه موافقه تر لاسه کولای سوای؛ خو دا دامریکا تېروتنه وه چې وې نکړه.
داپه داسې حال کې ده چې دامریکا غوڅ اکثریت حکومتي، ملکي اونظامي چارواکي دافغان جګړې پای او دیوې موافقې لاسلیک غواړي، په قطر کې دمذاکراتو مرکچیان هم دلوړو پرمختګونو او مهمو موضوعاتو دنهایي کېدو خبر ورکړی.
