کابل ټکى کام (جمعه، ۱۷ لړم ، ١٣٩٨ل)
د هند تر ولکې لاندې په جمو کشمیر کې د واورې اورښت له امله د څلورو تنو هندي سرتېرو په ګډون ۹ تنو خپل ژوند له لاسه ورکړی دی.
هندي رسنۍ وایي، سرتېرو د کپواړا په سیمه کې د واورین توپان په نتیجه کې له واورو لاندې شوي او دوه تنه نور یې په یوه ترافیکي پېښه کې وژل شوي دي.
د هند د هوا پېژندنې ادارې ویلي، چې په سري نګر کې ۳۵ سانتي متره واوره ورېدلې خو په کپواړا، شوپیان، ګندبال او باره مولا سیمو کې د واورې لوړوالی له سلو تر ۱۳۰ سانتي مترو پورې رسیږي.
په سیمه کې د ډیرو زیاتو واورو ورېدو او هوا حالاتو د خرابوالي له امله ټول ښوونځي او تعلیمي اداراې رخصت شوي او همدا راز د ډیری سیمو مواصلاتي لارې هم تړل شوي دي.
دې ځای کې د لا زیاتې واورې اورښت احتمال شته، سیمه کې خلک اندیښمن دي او دمرستو غوښتنه کوي، خو هندي حکومت تر اوسه اړو خلکو ته هیڅ قسمه مرستې نه دي رسولي.
