(کابل ټکی کام، ۱۳۹۸ ليندۍ ۲۸، پنجشنبه)
د روسيې او ايران امنيتي مسؤولین وايي، چې امریکا افغانستان ته د داعش وسله والو په لېږلو کې لاس لري او په دغه برخه کې يې ورسره همکاري کړې.
د دواړو هیوادونو امنیتي چارواکو دغه خبرې په ايران کې د سيمه ييز امنيت په کنفرانس کې د خبرو پر مهال وکړې.
د روسيې د ملي امنيت شورا سلاکار نيکولای پيتروشف وويل، چې امریکا په عراق او سوريې کې ماتې خوړلي داعشیان افغانستان ته لېږدولي ، هغوی سره يې مرستې هم کړي دي.
د پيتروف شف په خبره، لا هم په افغانستان کې له دوه نيمو تر څلور زره داعش وسله وال فعاليت کوي او له نشه يي توکو هرکال شپږ ميليونه ډالره لاسته راوړي چې په جګړه کې ترې ګټه اخلي.
په دغه کنفرانس کې د ايران د عالي امنیت شورا مشر علي شمخاني هم افغانستان ته د مات شويو داعش وسله والو په ورتګ اندېښنه وښوده.
هغه وويل، د سوري او عراق جګړه کې مات شوي داعشيان د افغانستان او سيمې امنيت خرابولو لپاره افغانستان ته لېږدول کېږي.
دا لومړی ځل نه دی چې ايران او روسيه پر امریکا د داعش وسله والو سره پر تګ راتګ کې د مرستې تور لګوي بلکې تر دې مخکې هم د افغانستان لپاره د روسيې استازي ضمير کابلوف او د افغانستان د ولسي جرګې ځينو غړو ويلي و چې افغانستان کې داعش وسله والو ته د نامعلومه چورلکو له لارې مرستې رسيږي او هغوی له یوې سيمې بلې سيمې ته په چورلکو کې لېږدول کيږي.
طالبانو په وروستيو کې په ننګرهار کې د داعش پرضد پراخ عملیات وکړل چې یاده ډله يې له ننګرهار ولايت څخه ورټوله او سلګونه وسه والو يې حکومت ته پناه يووړه چې ويل کیږي ځينې يې په کنړ او نورو سيمو کې د دولت له لوري بيا فعاليدو ته هڅول کيږي.
