ترکیې تېر کال نږدې ۲۰۰ زره افغان کډوال نیولي دي
کابل ټکى کام (سه شنبه، ۱۰ مرغومی ، ١٣٩٨ل)
د ترکیې د کډوالۍ ادارې ویلي چې تېر کال یې ټول ټال نیم میلیون غیر قانوني کډوال نیولي دي چې ډېری یې د عراق، سوریې، فلسطین، پاکستان، عراق، ګرجستان، افغانستان او میانمار دي.
د سرچینې په خبره له دې ډلې ۱۹۹زره او پنځه سوه کډوال افغانان وو، چې د وړم کال په پرتله یې شمېر څلور برابره زیاتوالی ښيي.
د ترکیې د قوانینو له مخې هغه کسان چې په غیر قانوني توګه دغه هېواد ته ورځي نو د کډوالۍ په موقتو تمځایونو کې ساتل کېږي او بېرته خپل هېواد ته استول کېږي.
ترکیه داسې مهال دغه راپورونه خپروي چې اوس هم زرګونه افغانان دغه هېواد ته د کډوالۍ لپاره زړه ښه کوي او له دې ځایه په قاچاقي لارو اروپايي هېوادونو ته اوړي.
کتونکي د دې عمده لامل په هیواد کې خونړۍ جګړې او بې کاري ښیي چې زرګونه افغانان یې مهاجرت او اروپایي هیوادونو ته په ورتګ مجبور کړي دي.
