(کابل ټکی کام، ۱۳۹۸ مرغومی ۱۲، پنجشنبه)
د سوريې د بشري حقونو د څار ډله وايي، چې د دغه هيواد ادلب ولايت په شمال غرب کې توغنديز بريدونو کې د ماشومانو په شمول نهه ملکيان وژل شوي دي.
د سرچينې په وينا، د اسد رژيم هوايي ځواکونو د ادلب په شمال غرب کې پر یوه ديني مدرسه توغنديز بريدونه کړی چې په ترڅ کې يې د پنځو کوچنيانو په شمول نهه ملکيان وژل شوي دي.
د بشري حقونو د دغه څارونکې ډلې مشر رامي عبدالرحمن د فرانسې خبري اژانس ته ويلي، په يادو بريدونو کې پنځلس تنه نور ټپيان شوي هم دي.
دوه ورځې مخکې د سور صليب نړيوالې ادارې مسؤولينو د روسيې رسنيو ته ويلي و چې د سوريې په جګړه کې له تيرو نهه کلونو راهيسې تر پنځوس زره زيات کسان وژل شوي، شل زره لادرکه او لکونه نور له خپلو سیمو بې ځایه شوي دي.