امین وردګ
پۀ ترکیه کې د جُمهوري ریاست لپاره د دوو مخکښو کاندیدانو (اردغان او اغلو) تر منځ سخته سیالي روانه ده، چې هر یو یې خپل ځان بریالی بولي، مګر اصلي نتیجه له خالق سره ده! نو ګورئ چې کوم یو بۀ یې ترکیې ته الله پاک انتخاب کړی دی؟
دا چې موږ افغانان او د نورې نړۍ زیاتره مسلمانان د اردغان پلوي او د اغلو مخالفت کوو؛ لامل لري! اردغان هلته وروسته له آتو لسیزو څخه پۀ زغرده د قرآن کریم تلاوت وکړ او پدې توګه یې له عربي رسم الخط څخه د کمال اتاترک ظالمانه او نا انصافانه تحریم لیرې کړ.
اردغان پر حجاب لګېدلی بندیز له خویندو پورته کړ.
د آیاصوفیه تاریخي جومات پۀ ګډون د ترکیې ټول جوماتونه یې د مسلمانانو پۀ مخ خلاص کړل ځکه خو اوس ترکیه د الله اکبر آزانګې زنګوي او د شپږسوه کلن عثماني دور یادونه پرې تازه کیږي.
ویل کیږي چې د انتخاباتو پر لومړۍ شپه اردغان له خپلو ګڼو پلویانو سره یو ځای آیاصوفیه جومات ته ننوت او هلته یې خپل رب ته پۀ زاریو پیل وکړ؛ نو ښکاره خبره ده چې له الله پاک څخه بۀ یې مرسته غوښتې وي او پۀ بدل کې بۀ یې رب ته د اسلام او مسلمانانو لپاره د ریښتیني خدمت وعده هم ورکړې وي.
یقیناً چې اردغان له اسلامي پلوه د ترکیې باالواسطه ناجي بللی شو، ځکه خو یې ملاتړ کوو؛ پۀ بریا یې خوشالیږو او پۀ ماتې یې خفه کیږو.
همدا راز د اغلو مخالفت هم له دې امله کوو، چې هغه غواړي پۀ ترکیه کې یو ځل بیا اسلام له حکومت څخه وباسي او سیکولر نظام حاکم کړي.
د اتاترک ظلمونه چې پر مظلومو ترکي مسلمانانو یې کړي وو، هېڅکله بۀ یې هم موږ هېر نۀ کړو او نۀ خو هیریږي.
دا هم ویل کیږي او پر مډیا ځینې اسناد ښيي چې د انتخاباتو پۀ لومړۍ شپه اغلو د کمال اتاترک قبر ته د ګلونو ګېډۍ وروړې وې او هلته یې ګڼ پلویان هم پۀ بدرقه ورسره تللي وو، چې خپلې نڅاوې او خرمستۍ یې کولې.
نو دا هم معمولي خبره ده چې اغلو به ارو مرو د اتاترک روح ته زېری ورکړی وي؛ چې ګني دا دی! موږ خو ګډ وډ او پۀ نڅاوو درته راغلو او دا وعده درکوو؛ چې ستا اډیالوژي بۀ بېرته را ژوندۍ کوو، پر ترکیه بۀ یې حاکموو او ستا تګلاره بۀ خامخا تعقیبوو.
ګورئ! موږ اصلاً د جُمهوري نظام پلویان نۀ یو او نۀ دا ډول نظامونه اسلامي نظامونه بولو.
موږ اردغان کوم ولی الله نۀ ګڼو، نۀ خو یې ټول سیاستونه تائیدوو او نۀ هم د دۀ تګلاره او حرکت سل پۀ سل کې اسلامي بولو.
بلکې موږ وایو چې: (پۀ ړندو کې د یوې سترګې والا پاچا دی!) نو اردغان د ترکیې لپاره موږ او نورې اسلامي نړۍ ته یو پۀ سله تر اغلو بهتر دی او دا سړی پۀ ښوره یو ګل شین شوی! ځکه خو یې ملاتړ کوو.
