کابل ټکی کام (شنبه، ۲۷ جوزا، ۱۴۰۲ل)
د افغانستان اسلامي امارت د کابينې ۳۵مه غونډه د رياست الوزراء د سياسي مرستيال او کفيل مولوي عبدالکبير په مشرۍ د غبرګولي په ۲۳مه نېټه تر سره شوه.په دې غونډه کې پرېکړه وشوه، چې د وږي ۹مه له افغانستان څخه د وروستي امريکايي سرتېري د وتلو ورځ په کليزه کې رسمي رخصتي بلل کېږي او د کار او ټولنيزو چارو وزارت ياده طرحه د نوي هجري قمري کال له پيل سره تائيد ده.په غونډه کې همدارنګه په بدخشان کې د ورېښمو لارې د سړک له اساسي جوړولو (قير کولو) ته اړتيا لرونکو برخو پرته د نورو ځايونو د جوړولو لپاره برابره شوې طرحه تائيد ده او د کابينې د ۱۴مې ګڼې مصوبې پر اساس، اړوند ادارې بايد په دې تړاو اړينې کړنې ترسره کړي.د کابينې په غونډه کې پرېکړه وشوه، چې د کابل سيند او نورو نامناسبو ځايونو کې د فاضلاب ټانکرونو د تخليې مخه بايد ونيول شي، په همدې موخه د چاپېريال ساتنې ملي ادارې په مشرۍ د ماليې، کرنې، اوبو لګولو او مالدارۍ، اوبو او انرژۍ او د کور او ښار جوړولو وزارتونو او د کابل ښاروالۍ د استازيو په ګډون پلاوي ته دنده وسپارل شوه، چې په دې اړه مناسب ځايونه په ګوته او حل لارې ورته ومومي.د کابينې په دې ناسته کې د ځمکو د غصب د مخنيوي او غصب شويو ځمکو د استرداد کمېسيون ته دنده وسپارل شوه، چې د بلخ مرکز کې د کود او برق شرکت اړوندو اپارتمانونو موضوع، چې تر اوسه د يادې فابريکې د پخوانيو کارکوونکو په تصرف کې دي، په اصولي توګه حل کړي.
