کابل ټکی کام (یکشنبه، ۳۰ تله، ۱۴۰۲ل)
د «ټايمز آف اسراييل» ورځپاڼې د خبر له مخې د غزې په تړانګه کې د اسراییلو د بریدونو پر ضد په مصر او اردن کې د خلکو د اعتراضونو د له امله د دغه هېواد چارواکو له اسرائيلي اتباعو غوښتي چې ژر دې له مصر، اردن او مراکش څخه ووځي.
دې ورځپاڼې لیکلي چې د لومړي وزیر دفتر او د بهرنیو چارو وزارت په یوه اعلامیه کې په مصر او اردن کې له ټولو اسراییلیانو غوښتي چې ژر تر ژره ووځي.
اعلامیې همداراز له اسراییلو غوښتي چې مراکش ته له غیر ضروري سفر ډډه وکړي.
په پورته یادښت کې له اسراییلي اتباعو څخه غوښتل شوي چې د منځني ختیځ په هیڅ کوم هیواد کې د عربي هیوادونو په ګډون په ځانګړې توګه په ترکیه، مصر، اردن، متحده عربي اماراتو، بحرین او مراکش کې میشت نه شي او همدارنګه مالیزیا، بنګله دیش، اندونیزیا او نورو هیوادونو ته سفر ونکړي.
دا په داسې حال کې ده چې په ترکیه کې د اسرایلو پر سفارت او قنصلګریو تر حملو وروسته له انقرې د اسراییلو سفیر او نور ډیپلوماتان وتلي دي.
اسرائیلو د اکتوبر له اوومې راهیسې د غزې تړانګه په بشپړه توګه محاصره کړې او سیمې ته یې د اوبو، برېښنا، تیلو او هر ډول بشري مرستو په رسولو بندیز لګولی دی.
د اکټوبر په اوومه حماس اسلامي غورځنګ د نورو فلسطیني ډلو په ملتیا د غزې په شاوخوا کې د اسراييلو په ښارونو د “طوفان الأقصی” په نوم بې ساري، حيرانوونکي او ځپونکي عمليات پیل کړل، چې په ترڅ کې يې لږ تر لږه ۲۰۰۰ اسرائيليان ووژل شول او ۴۶۰۰ نور ټپيان شول.
پر غزې د اسرائیلو د ځوابي بریدونو په ترڅ کې تر اوسه د ۱۶۶۰ ماشومانو په ګډون لږ تر لږه ۴۱۳۷ فلسطینیان شهیدان شوي او ۱۳ زره ۳۰۰ نور ټپیان شوي دي.
