د حماس سخت مقاومت صهیونیستي اشغالګر د غزې له شمالي سیمو شا تګ ته اړ کړي
کابل ټکی کام (سه شنبه، ۳۰ لړم، ۱۴۰۲ل)
د راپورونو له مخې د حماس اسلامي غورځنګ د پوځي څانګې “القسام لېوا” او نورو فلسطیني مقاومتي ډلو سخت مقاومت صهیونیستي اشغالګر د غزې له شمالي سیمو شا تګ ته اړ کړي دي.
اسراییلي رسنیو هم خبر ورکړی، چې په غزه کې د ځمکنیو عملیاتو د عمومي قوماندان په ګډون یې په تېر ۴۸ ساعتونو کې د غزې تړانګې په شمال کې ۲۷ پوځیان وژل شوي او له ځینو سیمو یې شاتګ کړی دی.
القسام او نورو فلسطیني ډلو داسې ویډیوګانې خپرې کړي، چې پکې د اسراییلو وژل شوي سرتېري لیدل کېږي چې مړي یې د غزې په سړکونو پراته دي او د ګڼ شمېر هغو ټانکونو او نورو ډول ډول پوځي وسایطو یې هم ویډیوګانې او انځورونه هم خپاره کړي، چې د اسراییلي ځواکونو تر تیښتې وروسته د فلسطیني مقاومتي ډلو لاسونو ته ورغلي دي.
د لبنان د حزب الله اسلامي غورځنګ په تېرو ۲۴ ساعتونو کې دوه داسې ویډیوګانې په خپل تلویزیوني چینل “المنار” خپرې کړي دي، چې د لبنان- اسراییلو پر پوله د اسراییلي/ صهیونیست سازمان د پوځیانو اډې، ټانکونه او اکمالاتي موټرو باندې د بریدونو صحنې پکې ښودل شوي دي.
په ورته مهال د یمن د حوثیانو د مقاومتي غورځنګ ویاند خبر ورکړی، چې نیول شوې اسراییلي کیښتۍ، عمله او پکې بار مالونه یې خوندي سیمو ته رسولي دي. د انصارالله د ویاند په خبره په نیول شوې کیښتۍ کې یې د شپیتو میلیونو په اندازه مالونه غنیمت کړي، چې په غزه کې د جګړې تر پای ته رسېدو وروسته به یې فلسطیني ولس ته ډالۍ کړي. دغه راز د حوثیانو ویاند خبرداری ورکړی، چې سمندري ځواکونه یې لا هم هڅه کوي چې په سره سمندرګي کې نورې اسراییلي او امریکایي بیړۍ هم په نښه او ونیسي.
