کابل ټکی کام (سه شنبه، ۳۰ لړم، ۱۴۰۲ل)
د یمن د حوثیانو د مقاومتي غورځنګ د پوځي څانګې انصارالله ویاند “جنرال یحی سریع” خبر ورکړی، چې نیول شوې اسراییلي کیښتۍ، عمله او پکې بار مالونه یې خوندي سیمو ته رسولي دي.
د نوموړي په خبره په نیول شوې کیښتۍ کې یې د شپیتو میلیونو په اندازه مالونه غنیمت کړي، چې په غزه کې د جګړې تر پای ته رسېدو وروسته به یې فلسطیني ولس ته ډالۍ کړي.
دغه راز نوموړي خبرداری ورکړی، چې سمندري ځواکونه یې لا هم هڅه کويے چې په سره سمندرګي کې نورې اسراییلي او امریکایي بیړۍ هم په نښه او ونیسي.
دا په داسې حال کې ده چې حوثیانو وړمه ورځ خبرداری ورکړی و، چې هره هغه کیښتۍ به په نښه کړي چې د اسراییلي صهیونیستي ريژیم بیرغ پرې رپیږي.
د ویلو ده چې اسراییلو او امریکا حوثیانو ته خبرداری ورکړی، چې نیول شوې کیښتۍ دې ژر تر ژره خوشې کړي کنه دوی به یې د خوشې کولو لپاره نظامي ګام اخیستلو ته اړ شي؛ حماس بیا د حوثیانو لخوا د اسراییلي کیښتۍ نیول ستایلي او یو زړور ګام یې بللی دی.
