کابل ټکی کام (جمعه، ۲۰، سلواغه، ۱۴۰۲ل)
که څه هم پاکستان کې د تېرې ورځې د ټاکنو د رایو شمېرنې پروسه لا روانه ده او شیبه په شیبه پایلو کې بدلون راځي؛ خو د غیر رسمي پایلو له مخې خیبر پښتونخوا ایالت کې د پخواني لومړي وزیر “عمران خان” اړوند کاندیدانو ډېرې رایې ګټلي او سیالو ګوندونو مهم کاندیدان یې مات کړي دي.
په یاد ایالت کې د تحریک انصاف ګوند اړوند کاندیدانو د مولانا فضل الرحمن په مشرۍ د جمعیت علماء اسلام ګوند، عوامي نیشنل ګوند، پروېز خټک، محمود خان او د پاکستان مسلم “ن” ګوند مهم مشر امیر مقام او نورو کاندیدانو ته یې ماتې ورکړې ده.
دغه راز له تحریک انصاف ګوند څخه وتلي پروېز خټګ او نوماندانو یې د خیبر پښتونخوا په ټولو حلقو کې ماته خوړلې او د تحریک انصاف ګوند اړوند کاندیدانو ترې میدان ګټلی ده.
که څه هم د رایو شمېرل لا هم دوام لري؛ خو د کتونکو په باور د اسې ښکاري، چې په خیبر پښتونخوا ایالت کې تحریک انصاف ګوند کولی شي چې حکومت جوړ کړي.
د ویلو ده، چې په خیبر پښتونخوا کې د تحریک انصاف ګوند د مشهورو څېرو له ډلې اسد قیصر، علي محمد خان، شهریار آفریدي، میرمن شاندانه ګلزار، میرمن مصباح واجد او میرمن زرتاج ګل وزیر ټاکنې ګټلي دي.
