کابل ټکی کام (چهار شنبه، ۶وری، ۱۴۰۴ل)
د پروان د امنیه قوماندانۍ د معلوماتو له مخې، د دغه ولايت په سیدخېلو ولسوالۍ کې څلور تنه وسله وال غله د امنيتي ځواکونو سره په نښته کې وژل شوي دي.
د امينه قومندانۍ له لوري په خپره شوې خبرپاڼه کې راغلي، چې يادې څلور کسيزې وسلوالې ډلې به د مجاهدينو او امنيتي ځواکونو له نوم څخه په استفادې له خلکو غلاوې او شوکې کولې.
په خبرپاڼه کې زياته شوې، چې دغه پېښه تېره شپه د سیدخېلو ولسوالۍ کمانګر په سیمه کې رامنځته شوې ده ليکي: «دغې ډلې د پروان ولایت په بېلابېلو برخو کې د مجاهدینو او امنیتي ځواکونو په نوم غلاوې کولې، دغه عملیات تېره شپه ۷:۳۰ بجې هغه مهال ترسره شول چې وسلهوال غله د غلا په نیت یو کور ته ننوتي وو.»
امنیه قومانداني وايي، چې له یادو غلو څخه دوه میله وسلې او یوه مخابره هم ترلاسه شوې دي.
له غلو سره په نښته کې د يوه امنيتي ساتونکي د ټپي کېدو خبر ورکړل شوی چې اوسمهال تر درملنې لاندې دی.
