کابل ټکی کام (شنبه، ۳۰ وری، ۱۴۰۴ل)
د افغانستان اسلامي امارت رئیس الوزراء ښاغلي ملا محمد حسن اخند نن له غرمې مخکې د پاکستان د لومړي وزیر مرستیال او بهرنیو چارو وزیر محمد اسحاق ډار په مشرۍ پلاوي سره چې په رسمي سفر کابل ته راغلی ليدلي دي.
نوموړي له ياد پلاوي سره د سیاسي او اقتصادي مسایلو سربېره د افغان کډوالو د اجباري اخراج په اړه خپلې اندېښنې شریکې کړې او افغان کډوالو سره چلند يې د نه منلو وړ بللی زياته کړې ده چې کډوالو سره روان وضعيت په کلکه غندي او په وينا يې له پاکستان څخه مو جدي غوښتنه ده چې له افغان کډوالو سره بد چلند پای ته ورسوي.
ښاغلي ملا محمد حسن ټينګار کړی چې باید موجودو ستونزو ته د خبرو له لارې اساسي حل لارې ولټول شي او د خبرو ترڅنګ عمل کول پرې مهم دي.
نوموړي دغه راز ويلي، هغه عوامل چې سیاسي او اقتصادي اړیکې خرابوي باید مخنیوی او له تکرار څخه یې ډډه وشي.
د پاکستان د لومړي وزیر مرستیال او بهرنیو چارو وزیر محمد اسحاق ډار کابل ته په خپل سفر خوښي ښودلې او وې ویل، د دې سفر موخه له افغانستان سره د اقتصادي او سیاسي اړیکو پراختیا او پیاوړتیا ده او زياته ئې کړه هڅه کوو په شریکه موجوده ستونزې د خبرو له لارې حل کړو.
ښاغلي ډار زياته کړې د اقتصادي اړیکو پیاوړتیا لپاره به افغانستان ته د پاکستان له لارې په صادرېدونکو زیات شمېر توکو لس سلنه مالیه پای ته ورسوي او د سوداګرۍ د زیاتوالي لپاره نور مهم اقدامات هم په پام کې نیول شوي دي.
