کابل ټکی کام (یکشنبه، ۲۶ زمري، ۱۴۰۴)
د اسلامي جهاد پوځي څانګې سرايةالقدس ویلي، چې د غزې له ختیځ څخه د صهیونیستي پوځ تر تېښتې وروسته یې ځواکونو د دوښمن ۵۲ ټانکونه په داسې حال کې موندلي، چې په بشپړه توګه له منځه تللي و. یادې ډلې د یوې خبر پاڼې په خپرولو سره ویلي، چې یاد ټانکونه د مقاومت د هغو ماینونو ښکار شوي، چې سیمې ته د دوښمن پوځ تر ننوتلو مخکې ځای پر ځای شوي وو.
په ورته مهال د قدس لېوا یو لوړ پوړي قوماندان الجزیرې ته ویلي، چې په عملیاتو کې یې د اسرائیلو شاوخوا ۵۲ پوځي وسایط له منځه وړي دي.
یاد قوماندان ټینګار کړی سره له دې چې د خلکو کورونه په پراخه کچه ویجاړ شوي، خو د جګړې په ډګر کې اشغالګر پوځ سخت زیانونه لیدلي دي.
له بلې خوا د حماس پوځي څانګې کتائب القسام هم په یوه اعلامیه کې ویلي، چې د تېرې میاشتې په ۱۶مه نېټه یې د غزې د ختیځې شجاعیه سیمې اړوند د منصوري سړک پر سر د اشغالګرو د قوماندې او کنټرول مرکز د “رجوم” توغنديو په وسیله په نښه کړی دی.
د فلسطیني مقاومت ډلو د څرګندونو له مخې، هغوی په پرلهپسې ډول پر اشغالګرو کمینونه وهلي، د هغوی سلګونه وسایط یې له منځه وړي او د منځني او لیرې واټن توغندیو په وسیله یې د صهیونیستي ښارونو او مېشتځایونو په نښه کولو ته دوام ورکړی دی.
