کابل ټکی کام (شنبه، ۳ لړم، ۱۴۰۴ل)
د چین له لوري د ۱۰۰ میلیونه یوانو بشري مرستو دویمه جوپه، چې ۱۵۶ فابریکوي کورونه پکې شامل دي، د کډوالو او راستنېدونکو چارو وزارت ته وسپارل شوه.
د کډوالو او راستنېدونکو چارو وزارت مسلکي مرستیال مولوي عبدالرحمن راشد د دغو مرستو د تسلیمېدو پر مهال د چین له دولت او خلکو مننه وکړه او دا یې د دواړو هېوادونو د دوستۍ او بشري همکاریو نښه وبلله. نوموړي د بېځایه شویو او راستنېدونکو د ستونزو د هوارولو لپاره د لا زیاتو همکاریو غوښتنه هم وکړه.
په کابل کې د چین د سفارت مرستیال بائو خوهوی د مرستو د سپارلو پر مهال وویل، چې د چین او افغانستان اړیکې تاریخي دي او هېواد به یې له افغانانو خپل ملاتړ ته دوام ورکړي. نوموړي زیاته کړه، چې دغه مرستې د دواړو هېوادونو ترمنځ د همکارۍ او دوستۍ څرګندونه کوي.
دا مرستې د بېځایه شویو او راستنېدونکو افغانانو د سرپناه او اړینو اسانتیاوو د برابرولو لپاره چمتو شوې دي.
