داسې ښکاري چې د کابل ادارې د زوال ورځې بلکل رانږدې دي بلکې همدا يې ورځې بلل کيږي، له يوې خوا د اوسنيو پيل کېدونکو بين الافغاني مذاکراتو په تړاو خپرېدونکې اوازې او له بل لوري د ارګ د مشر هغه اندېښنې چې د خپل واک د خاتمې په اړه يې لري؛ هغه څه دي چې د کابل ادارې ستوری يې له لوېدو سره مخ کړی.
کابل اداره په حقيقت کې لا له لومړي سره د سولې په باب هم خپل حيثيت له لاسه ورکړی او هم يې فرصت بايللی، ځکه چې د دوحې تړون اړوند د پنځه زره طالب بنديانو پد خوشې کولو په تړاو خليلزاد او امریکايي چارواکو خورا زياتې هلې ځلې وکړې تر څو غني، ارګ او د ارګ پر شا او خوا نورې سوله ضدې څېرې وپوهوي او ورته ووايي چې داسې وخت به راشي چې شته فرصت به مو له لاسه ووځي او همداسې به ناست ياست.
ارګ، غني او پر شا او خوا يې مغرضې کړۍ لومړی په دې کاذبه باورمندۍ اخته وې چې ګواکې امریکايان د خپلو وتلو په باب له طالبانو سره هسې ټوکې کوي، د امریکا د سوپر طاقت څېره يې لا تر هغه وخت په ذهن کې ګرځېده، نو له دې امله يې سولې ته چندان زړه نه ښه کاوه، بلکې همېشه به يې پر طالبانو غږ کاوه چې ګواکې تسليم شي.
خو وخت او حالات بدل شول او د غني، ارګ او نورو سوله ضدو کړيو په خلاف وڅرخېدل….
امریکا په چټکو وتلو بوخت دي، غواړي چې په وتلو کې له طالبانو سره پر شوي توافق عمل وکړي، خو بل لور ته کابل اداره اوس هم چې څه نا څه يې عقل ځای ته راغلی؛ هم د سولې پر خلاف کړنې کوي. خو ښايي اوس په دې پوهېدلي وي چې امریکا نور له افغانستان څخه وځي او ښايي يو نظامي عسکر هم په افغانستان کې پرېنه ږدي. د کابل ادراې له اذهانو څخه دغه کاذبه باورمندي هم لرې شوې چې ګواکې ناټو او امریکا به په افغانستان کې د ارګ ساتونکو عسکرو ته د تمويل او تجهيز وسايل، پيسې او نور ضروريات ورپوره کړي او د يوې اوږدې مودې لپاره به د دوی د بقا سبب وګرځي.
بلکې اوس يې ايله پوره يقين راغلی چې امريکا به دغه اداره د طالبانو رحم او کرم ته پرېږدي او هغه بيا د طالبانو خوښه چې له دوی سره څه ډول عمل کوي.
دوی د سولې او افغان وژنې داسې څېره لري چې عام افغان ولس يې ښايي دغه دوه ستر جنايتونه ونه بښي.
د کابل ادارې د چارواکو اندېښنې او وارخطايي له دې هم معلومېږي چې پلاوی له نظرياتي اړخه په دوو پاړکيو وېشل شوی دی.
يوه يې هغه ډله ده چې نه غواړي نور له تش نامي جمهوريت څخه د دفاع لپاره خپله خوله چوله کړي او يا هم په بين الافغاني مذاکراتو کې له جمهوريت څخه د دفاع خبرې وکړي… دغه ډله غواړي چې له طالبانو سره ښايي په دې باب وغږېږي چې راتلونکی نظام څرنګه تعريفېږي؟
د کابل ادارې د مذاکراتو د پلاوي دغه نظرياتي ډله داسې انګېري چې که چېرته امریکايان ووځي او کابل اداره يوازې پاتې شي نو دا خو څرګنده خبره ده چې د کابل ادارې لوړپوړي چارواکي په افغان ملت کې منفور ګرځېدلي. نو داسې نه چې دوی هم افغان ولس د کابل ادراې د لوړپوړو چارواکو په کټګورۍ کې شامل کړي….
د کابل ادارې د مذاکراتي پلاوي بله نظرياتي ډله هغه ده چې څه نا څه ښايي په پيل شويو مذاکراتو کې د کابل ادارې د جمهوريت او د دوی د ګټو د دفاع؟ خبرې وکړي. خو هغوی هم ښايي تلې ته وګوري او که چېرې په مذاکراتو کې د طالبانو د دريځ تله درنه شي نو هغوی هم له خپل متزلزل دريځ څخه تېرېږي. او پر اسلامي نظام به توافق کوي…
چې دغه مهال به نو د اسلامي نظام مخالفینو ته هيڅ ډول عذر، وجه او علت پاتې نشي، بلکې يا به اسلامي نظام مني او يا به هم د افغان ملت له غبرګون سره مخ کيږي…
