کابل ټکی کام (يکشنبه، ۴ لړم، ۱۴۰۴ل)
د حماس د سیاسي دفتر مرستیال خلیل الحیه ویلي، چې د حماس وسله یوازې د اشغال او دښمن د تجاوز پر مهال ورسره ساتي او که اشغال پای ته ورسېږي، نو دا وسله به راتلونکې دولت ته وسپارل شي.
هغه د الجزيرې سره په مرکه کې وویل، د حماس هدف ثبات او ملي یووالی دی او دغه موضوع لا هم د فلسطیني ډلو او منځګړو هېوادونو تر منځ د بحث لاندې ده.
الحیه زیاته کړه، چې د حماس او فتح تر منځ د نړیوالو ځواکونو پر ځای پر ځای کولو او د اوربند د څارنې په اړه توافق شوی، او دغه ځواکونه به د غزې پوله او اوربند څاري.
هغه وویل، حماس به د غزې د ادارې ټول واکونه، په شمول د امنیتي چارو، د غزې د ادارې کمېټې ته وسپاري.
نوموړي څرګنده کړه، چې د اسرایو موضوع یوه ملي مسأله ده او حماس د ټولو فلسطیني بنديانو د خلاصون لپاره هڅې کوي. ده وویل، اسراییلي لوری لا هم په ځینو نومونو ټینګار کوي، خو هڅې دوام لري.
الحیه همداراز د غزې د بشري وضعیت د خرابېدو یادونه وکړه او زیاته یې کړه، چې غزه هره ورځ ۶ زره موټرو مرستو ته اړتیا لري، خو یوازې ۶۰۰ موټر پرېښودل کېږي، چې دا کار د تړون د نقض لامل ګرځي.
