د الشفاء روغتون د تجهیز او فعالولو په اړه پرېکړې وشوې
کابل ټکی کام (دوشنبه، د لړم ۱۱مه)
د اسلامي امارت د ریاستالوزراء اداري مرستیال مولوي عبدالسلام حنفي په مشرۍ د الشفاء روغتون د رهبرۍ پلاوي غونډه جوړه شوه.
د اسلامي امارت د ویاند مرستیال مولوي حمدالله فطرت وايي، چې په دې غونډه کې د پلاوي غړو د خپلو فعالیتونو او کړنو راپور وړاندې کړ.
د نوموړي په وینا، په غونډه کې د روغتون د اړتیا وړ طبي وسایلو د برابرولو، د څانګو د فعالولو، د متخصصینو د ګومارنې او له روغتون څخه د اغېزمنې ګټې اخیستنې په اړه بحث وشو او په دې برخه کې لازمې پرېکړې ونیول شوې.
