کابل ټکی کام ۰۷غويي/۱۳۹۵، احمدالله مهاجر
د افغانستان د بهرنیو چارو وزارت د ننګرهار پر دوو ولسوالیو د پاکستاني پوځیانو له خوا د وروستي برید په غبرګون کې د پاکستان سفیر احضار کړی.
د افغانستان د بهرنیو چارو وزارت له لورې په خپره شوې اعلامیه کې راغلي دي، چې د ننګرهار پر لعل پورې او ګوشتې ولسوالیو باندې د پاکستاني پوځیانو له لورې د وروستيو راکټي بریدونو په غبرګون کې دوی د پاکستان سفیر سید ابرار حسین احضار کړی دی.
باید ووایو، چې د پاکستاني پوځیانو له خوا په دغو راکټي بریدونو کې یو افغان سرحدي سرتېری وژل شوی، او دوه نور سخت ټپیان شوي دي.
د دغه وزارت معین نصیر احمد اندیشه دغه بریدونه په کلکو ټکو غندلي، او د پاکستان سفیر ته یې ویلي دي، چې د پاکستاني پوځیانو له لورې دغه بریدونه داسې مهال ترسره شوي دي، چې دوی د کابل د وروستي برید په غم ککړ وو.
معین د پاکستان له سفیر سید ابرار حسین څخه غوښتنه کړې ده، تر څو د دغو سرغړونو مخه ژر تر ژره ونیسي، او د دواړو ګاونډیو هېوادونو اړیکې نورې د زیان سره مخ نه شي.
د یادولو ده، چې د پاکستاني پوځیانو له لورې وړاندې هم د افغانستان په یو شمېر سرحدي ځواکونو بریدونه شوي وو.
