ناټو وايي طالبان د پخوا په نسبت پیاوړې حملې ترسره کولای شي

کابل ټکی کام هاشمي عبدالله
د ناټو عمومي قومنداني خبر ورکړی دی چې په نږدې راتلونکې کې به طالبان نورې قوي حملې هم ترسره کړي، خو دا امید یې وښودو چې افغانان به د هغه آته مهمو کسانو په نیولو کې له افغان سرتیرو سره مرسته وکړي چې په کابل، خوست، لوګر او پروان کې د سرتیرو حملو هوډ لري.
په افغانستان کې د ناټو ویاند فرینانډو ایسریلا ددې آته کسانو په اړه د نورو معلوماتو ورکولو څخه ډډه وکړه خو ویې ویل چې ددوی په اړه به استخباراتي معلومات له افغان امنیتي ارګانونو سره شریک کړي.
ناټو ویاند زیاته کړه چې د طالبانو له لوري د تېرې سه شنبې د ورځې حملې وښوده چې طالبان هر وخت کولای شي زورورې حملې د کابل په مهمو ځایونو باندې ترسره کړي، او دوی د پخوا په نسبت زیات قوي شوي دي.
نوموړي زیاته کړه چې داسې کره اسناد په لاس کې لري چې په نږدې راتلونکې کې به د طالبانو له لوري په کابل، لوګر، پروان او خوست کې نورې سترې حملې هم ترسره کړي.