کابل ټکی کام ۱۶غويي/۱۳۹۵، سمسور ګیلاني
ملګرو ملتونو د سوریې حکومت په حلب ښار کې په ترسره شویو بریدونو تورن کړی دی، او پر عاملینو یې د عدالت د پلي کولو غوښتنه کړې.
د ملګرو ملتونو د سیاسي چارو مشر جیفري فیلټمن پرون د دغه سازمان امنیت شورا ته د وینا پر مهال سوریه د حلب پر بریدونو تورنه کړه، او زیاته یې کړه، چې د دغو بریدونو پر عاملینو باید عدالت پلی شي.
جیفري فیلټمن د خپلې وینا پر مهال پر روغتونونو قصدي او مستقیمي حملې جنګي جرمونه وبلل.
ده همدا راز پر خلکو د قحطي راوستلو په توګه له وسلې کار اخیستل جنګي جرم وبللو.
په ملګرو ملتونو کې د بریتانیا سفیر هم جیفري فیلټمن ته ورته څرګندونې کړي دي، او سوریه یې په حلب کې په بریدونو تورنه کړې ده.
له بلې خوا سوریه او روسیه وایي، چې د سوریې رژیم په حلب ښار کې له «تروریستي» ډلو سره جګړه کوي.
