کابل ټکی کام ۳۰غويي/۱۳۹۵، سمسور ګیلاني
بن علي پېلدرم د ترکیې د عدالت او پراختیا د ګوند له خوا د ترکیې لومړي وزارت چوکۍ ته نوماند وټاکل شو.
د دغه ګوند د ویاند له قوله، بن علي یېلدرم چې د ترکیې د لومړي وزیر وزارت څوکۍ ته نوماند دی، د عدالت او پراختیا د ګوند ایزومیر وکیل او همدا راز د ټرانسپور، بحري چارو او مخابراتو وزیر هم پاتې شوی دی.
بن علي یېلدرم هم د یوې وینا پر مهال له دغې پرېکړې څخه مننه کړې ده.
«د هغه ګوند مشرتابه ته د نوماندۍ له امله وياړم چې د تاسيس را پدېخوا يې د غړيتوب وياړ لرم، په عين حال كې دا ډېر لوى مسئوليت هم دى.»
نوموړي همدا راز ژمنه وکړه، چې په نوي حکومت کې به د مطابقت تر څنګ د «ترهګرۍ» پر خلاف هم کوټلي ګامونه پورته کوي.
بن علي یېلدرم چې ۶۱ کاله عمر لري، په ۱۹۵۵م کې د ترکیې په ارزینجان ولایت کې زېږېدلی دی.
نوموړي لوړې زدکړې د ترکیې د استانبول د تخنیکي پوهنتون د کښتیو د جوړولو او بحري علومو په برخه کې د ماسټرۍ تر درجې پورې پای ته رسولي دي.
همدا راز یې په سویس هېواد کې په بحر کې د ځاني او مالي امنیت ساتنې په برخه کې تخصصي زدکړې هم کړي دي.
بن علي یېلدرم د خپل علم نه په استفادې سره په بحري ټرانسپورټ او همدا راز یې د ټرافیکي ستونزو د هوارولو دندې اجراء کړي دي.
د یادولو ده، له دې څخه وړاندې د ترکیې لومړی وزیر داوود اوغلو وو، چې په ترکیه کې له واکمنې کورنۍ سره یې د اختلاف له کبله دغه څوکۍ پرېښودله.
