د خواشینۍ خبر

کابل ټکی کام ۰۳ چنګاښ/۱۳۹۵، مبارزافغان

بسم الله والحمدلله…

په ډېره خواشینۍ سره مو خبر ترلاسه کړ چې د کابـــــل ولایـــت د موسهي ولسوالۍ د عبدالرؤف قلعه اړوند د شیخ القرآن والحدیث علامه( عبدالقدوس جان)قدوسي” رحمه الله”
د زیارت ترڅنګ د سیمې په یوه لویه مدرسه (دارالعلوم اسلامیه موسهي) باندې له څو ورځو را په دېخوا د حکومتي ځواکونو لخوا پرلپسې نظامي بریدونه کیږي .
لومړی يې د هاوان په مرمۍ یاده مدرسه ویشتې او بیا یې څو ورځې وروسته د سپکو او درنو وسلو پیرونه له دوو طرفونو څخه پرې کړي چې له امله يې نوموړې مدرسې ته له مالي زیان سره سره د یادې مدرسې یو شاګرد چې په درس مصروف و ولګید او شدید زخمي شو.
د مدرسې أراکینو چې کله دغه زخمي زده کوونکی د روغتون په لور روان کړ حکومتي چارواکو یې په لاره کې مخه ونیوله او روغتون ته یی د تګ اجازه نه ورکولــــه.
له دې پیښې څخه وروسته چې د مدرسې استاذان او د منطقې خلک د مربوطه ولسوالۍ مقام ته د خپل عرض په خاطر لاړل، د دې پر ځای چې حکومتي مسؤلین د دوی عرض واوري او د دوی اوښکې پاکې کړي، بر عکس یې دوی ته ګواښونه وکړل او ورته ویلي یې دي چې په دغه منطقه کې چې زمونږ امنیتي ځواکونو ته هر نوعه مشکل پېښ شي مونږ به بیا هم د تېر پشان نوموړې مدرسه خپل نظامي هدف وګرځوو.
نو د ولس غږ تر اوسه حکومتي چارواکو نده اورېدلی او نه یې مثبت جواب ورکړی.
یاده دې وي چې له مذکوره مدرسې څخه هرکال په لسګونو د قرآنکریم حافظان، د نبي کریم صلی الله علیه وسلم د حدیثو مبارکه و فاضلان فارغیږي او د مروجه فنونو مکمل کتابونه په دې مدرسه کې لوستل کیږي.
او دا مدرسه د ولس د خلکو په زړونو کې خاص ځای لري.
دا پېښه پداسې حال کې رامنځته شوې چې څو ورځې وړاندې په همدغه منطقه کې پر حکومتي ځواکونو پرلپسې چاودنې وشوې او د دغو چاودنو مسؤلیت هم د حکومت ضد مخالفو (طالبانو)په غاړه اخیستي.
د یادونې وړ ده چې د حکومت د دا ډول کړنو له امله د منطقې په سلګونو زده کوونکي د قرآنکریم له زده کړې څخه محروم پاتې کیږي او شوي، حکومتي چارواکي یې د عام ولس زورونه کوي، کورونه يې په مرمیو ولي او رنګا رنګ تکالیف ور رسوي.
تېر کال یې هم د همدې ولسوالۍ (د قلطغان) په کلي کې یوه زنانه د شپې لخوا چې په ډېره بې رحمانه توګه یې په ډزو شهیده کړه او په همدې سیمه کې داسې په لسګونو پیښې شوي چې اکثره عاملین يې حکومتي چارواکي دي.

همدارنګه یې د دې ولس په لسګونو بې ګناه خلک بندیان کړي او د شکنجې په زور یې ترې غلط اقرارونه اخیستل شوي، د حکومت د ظالمو قاضیانو لخوا زیات قیدونه ورکړل شوي او بغیر له زیاتو پیسو څخه يې په نورو طریقو نه خلاصوي، که مجرم وي اوکه نه وي د درواغو دوسیې يې ورته جوړې کړي.
په لسګونو اسیران په همدې شکل د پلچرخي، باګرام په کرغېړنو زندانونو کې يې بې سر نویشته اچولي، حتی چې د بعضو بندیانو قیدونه پوره هم دي سره له دې د تورو تمبو شاته پراته دي.

بل حکومت ته منصوب چارواکو یې (د اربکیانو) په نامه يې څو څو واره په همدغه منطقه کې د مظلومو خلکو کورونه، دوکانونه لوټلي همدارنګه یې خلک بې ځایه ډبولي او دا کړنې یې لاروانې دي.
دا ټول هغه څه دي چي د ولس د نا ارامي سبب ګرځیدلي، ولس سره د حکومتي چارواکو دا رنګه کړنې نور د زغملو وړ ندي او نه به يې وزغمي.

باید ووایو چې اشرف غني کله هم جمهوري انتخاباتو ته ودرید د هغه له لومړیو خبرو څخه یوه داهم وه چې ویل یې:
“زه به د ارګ او جومات له مابین څخه واټن لرې کوم او یو ځای کوم به يې” خو متأسفانه په عمل کې داسې ونشول بلکې بلعکس کړنې شروع شوې او…
چې ښه بېلګه يې د همدغې مدرسې په هاوانونو ویشتل دي دارنګه ډېرې پېښې د ده په شوم اقتدار کې رامنځ ته شوي او لا دوام لري.
هېره دې نه وي چې کله هم حکومتې چارواکي د هیواد په مختلفو سیمو کې له طالبانو سره له مخامخ جکړې څخه پاتې راشي بیا یې غچ له بیګناه ملکي هیوادوالو څخه اخلي، دا کړنه به نه یواځې د حکومت په تاوان شي بلکې خلک به عمومي پاڅون ته مجبوره کړي.
دا رنګه او دېته ورته پیښې د هیواد په مختلفو سیمو کې شوي چې ډېر بد عواقب يې لرلي او د حکومت په زیان تمام شوي دي.