کابل ټکی کام ۱۳چنګاښ/۱۳۹۵، سمسور ګیلاني
د عراق پلازمینه بغداد کې دوې زورورې چاودنې شوي دي، چې له کبله ۱۶۰ کسان مړه او ټپیان شوي دي.
د یو شمېر رسنیو په خبر کې ویل شوي دي، چې لومړۍ چاودنه په یوه موټر کې د ځای پر ځای شویو چاودېدونکو توکو په مټ په کراده سیمه کې یوه رسټورانټ ته څېرمه د خوراکي توکو د پېر او پلور پر یوه مرکز شوې ده، او دویمه چاودنه د شیعه مېشتو پر سیمه شوې ده.
د دغه خبر د مرګ ژوبلې پر شمېرې رسنۍ متفقې نه دي، یو شمېر زیاته شمېره ښيي، او یو شمېر کمه شمېره ښيي.
رویټرز خبري اژانس د عراق د یوې امنیتي سرچینې له قوله د وژل شویو شمېره ۸۰ کسان ښودلې ده.
SKY NEWS ARABIA ټلویزیون وايي، چې په دغو چاودنو کې ۲۴ کسان وژل شوي دي، او ۶۰ نور ټپيان دي.
خو د عراق یوه وېبپاڼه (IRAQ NEWS) وايي، چې په دغه چاودنه کې ۶۰ کسان وژل شوي دي، او ۱۰۰ نور ټپيان دي.
دغې رسنۍ د سیمې څخه انځورونه هم خپاره کړي دي، چې پر ودانۍ سختې لمبې بلې دي، او داسې ښکاري چې د مرګ ژوبلې کچه نوره هم زیاته شي.
د دغو چاودنو پړه داعش ډلې پر غاړه اخیستې ده.
ویډیو
