لیکنه ـ بدر منصور
امیر المؤمین شیخ الحدیث هبة الله اخندزاده د نن عصر ابوبکر او عمر دی، د ده رالېږل شوی پیغام لوستل او عملي کول پر مؤمنانو لازم دي، ځکه د مسلمانانو د امیرانو هره یوه کلمة د نورو خلکو تر یو کتاب خبرو اهمّیت او فایده لري. دا د هغه چا پیغام دی چې په نن عصر کې یعني په هغه زمانه کې چې دین سکروټه ګرځېدلی دی، د مؤمنانو امیر دی، د دین د نفاذ لپاره ځان قرباني کوي او د الله (ج) ټولو لویو او وړو دښمنانو ته په غېږ ورغلی دی.
دا پیغام ډېر هغه شکونه زائلوي چې د افغانانو په ذهنونو کې د غربي میډیا له خوا پېچکاري شوي دي، غمځپلو مؤمنانو ته تسلي ورکوي چې که امیران له منځه تللي خو دین له منځه نه دی تللی، او الله (ج) مؤمنانو ته نور هماغسي امیران ورکړي دي چې دین ته وینه ورکړي.
دا پیغام د مؤمنانو تر منځ د اتفاق، اتحاد، ترحم او ورور ګلوۍ اظهار کوي، او د صلیبیانو او د هغوی د مزدورانو هغه تبلیغات دروغ ثابتوي چې وایې د مسلمانانو تر منځ اختلافات او بې اعتمادي شته، او دوی به موږ ته د تسلیمۍ پرته ښه راتلونکی ونه لري.
دا پیغام مؤمنو زړونو ته د خپلواکۍ، سوکالۍ، آزادۍ او یوې ښې راتلونکي الهام ورکوي، او هغه نا امیدي له منځه وړي چې د اجیرو رسنیو له خوا شپه او ورځ تبلیغیږي.
دا پیغام هیوادوالو ته ډاډ ورکوي چې اسلامي امارت د خپل هیواد او ولس خواخوږی دی د خپلو وینو په بیه به د هیواد، ولس او تأسیساتو ساتنه کوي.
دا پیغام جوتوي چې اسلامي امارت لکه څنګه چې د غربي میډیا له خوا تبلیغیږي یوازي د جګړې شوقي نه دی، بلکه سالم تفاهم او حل لوري ته هم ژمن دی، خو دا چې اوس جګړه پر مخ وړي دا د عدالت په غوښتنه، او بل دا چې د جګړې مقابل لوری سالم تفاهم نه پیژني.
