کابل کې جنایات ورځ تر بلې په زیاتېدو دي

کابل ټکی کام ۱۴چنګاښ/۱۳۹۵، احمدالله مهاجر
امنیتي مقامات وايي، چې په کابل کې تر بل هر ولایت څخه ډېر جنایات ترسره کیږي.
د کابل امنیتي چارواکو رسنیو ته ویلي دي، چې په تېره یوه میاشت کې د کابل امنیتي وضعیت ډېر خراب شوی دی.
د کابل د پولیسو قومندان رسنیو ته وویل، چې د همدغو نا امنیو ستر لامل د دوی سره د لازمو امکاناتو نه شتون ده.
کابل چې د شپې له خوا ډېر روښانه وي، خو بیا هم دا ډول پېښې پکې پټې ترسره کیږي، او د کابل ډېری اوسېدونکي ترې نا خبره وي.
دغه نا څرګنده وسله وال چې په کابل کې یې پر جنایاتو لاس پورې کړی دی، په توره جامه کې یې مخونه پټ وسله په لاس له خلکو څخه د ټوپک په زور موټر، پيسې او نور څيزونه اخلي.
د کابل یوه اوسېدونکي سید رحمان وايي:
«د موټر دننه تیاره وه، او زه هېڅ متوجه نه وم، چې نا څاپه راباندې غږ وشو، چې پیسې دې راوباسه، زه وارخطا او متوجه شوم، چې ومې کتل، د هغوی سره تمانچه وه.»
د کابل یو بل اوسېدونکی حبیب ناظم وايي:
«ان تر دې چې زه یې راښکته کړم، راته یې وویل، چې مخ ته دې حرکت ورنه کړې، او نه زمونږ په لور وګورې، کنه له منځه دې وړو.»
د کابل د پولیسو په وینا چې د تېر کال په وروستیو درو میاشتو کې ۹۰۶ کسان په ۸۵۸ جنایي پېښو کې د لاس لرلو په تور نیول شوي دي.
مګر د روان کال په لومړیو درو میاشتو کې د نیول شویو کسانو شمېر ۱۳۲۶ کسانو ته رسېدلی دی، چې په ۸۳۷ بېلابېلو جنایي پېښو کې لاس لري.
له دغو کسانو څخه ۹۱ تنه د قتل په تور، ۱۰ تنه د اختطاف په تور او ۲۳۰ نور د ډول ډول غلاګانو په تور نیول شوي دي.
له دغو کسانو څخه نظامي جامې هم لاسته راغلي دي.
دغه نا څرګنده وسله وال په کابل کې د سرمایه دارانو د نیولو لپاره خپلې مټې بډ وهلي.
د جنایي جرمونو د رابرسېره کولو رئیس فریدون عبیدي بیا وایي، چې له مخکې څخه د کابل وضعیت ښه دی، او هېڅ د تشویش وړ نه دی.
د یادولو ده، د دا ډول نا څرګندو وسله والو سره ډېری دولتي چارواکي لاس لري، لارې ورته ښايي، او د جنایاتو په ترسره کولو کې ورسره مرسته کوي، او په دغه ناوړه عمل ورته د لارو پرانیزولو ډاډ ورکوي.