کابل ټکی کام ۲۱چنګاښ/۱۳۹۵، احمدالله مهاجر
د پکتیا ولایت د احمدابا ولسوالۍ د سیمه ییزو پولیسو قومندان میر اسلم دور اندیش په یوه بمي چاودنه کې وژل شوی دی.
د پکتیا امنیه قومندان مل پاسوال قادر ګل ځدراڼ نن رسنیو ته وویل، چې نن غرمه يوولس نيمې بجې د احمد ابا ولسوالۍ د سیمه ییزو پولیسو قومندان میر اسلم دور اندیش د یوې بمي چاودنې په ترځ کې ووژل شو.
ځدراڼ وایي، په دغه چاودنه کې د دور اندیش موټر له منځه تللی دی، او د ده یو ساتونکی ټپي دی.
د احمدابا ولسوالۍ اوسېدونکي وايي، چې میر اسلم د خوښۍ د مراسمو د لمانځلو لپاره یوه کور ته روان وو، چې د احمد اباد ولسوالۍ پر عمومي سړک تر پلچک لاندې د یوه ځای پر ځای شوي ماین په چاودېدلو سره ووژل شو.
د احمد ابا د اوسېدونکو له قوله چې دور اندیش له چاودنې وروسته ژوندی وو، او د سختو ټپونو له کبله یې په روغتون کې ساه ورکړه.
وړاندې هم پر میر اسلم دور اندیش باندې څو ځلې بریدونه شوي وو، خو دی ترې ژوندی وتلی وو.
میر اسلم تېر کال د احمد ابا ولسوالۍ د سیمه ییزو پولیسو قومندان ټاکل شوی وو.
د دولت مخالفو وسله والو تراوسه پورې رسنیو ته څه نه دي ویلي.
