د غلام قادر رحماني نومي اربکي قومندان بد چلند، د فاریاب پر عامو خلکو د اوبو تر بنديز ورسېد

تېره ورځ د میمنې او پښتونکوټ ولسوالیو لسګونو خلکو د یوې اعتراضیې غونډې په دایرولو سره وویل، چې د ولایتې شورا د رئیس پلار او په دغو سیمو کې د اربکیانو قومندان (غلام قادر رحماني) له دوو میاشتو راهیسې په دوی باندې د څښلو اوبه بندې کړي دي.

اعتراض کوونکو دا هم وویل، چې د اوبو بندیز دوی له ډېرو ستونزو سره مخ کړي دي، کښتونه یې د وچېدو په درشل کې دي.

د دوی په وینا چې یوازې د څښلو اوبو لپاره ډېر لرې ځای ته سفر کوي.

دوی اندېښنه وښودله، که د دغو خپلسرو اربکیانو مخه ونه نیول شي، دوی به له نورو سترو ستونزو سره هم مخ شي.

د یادولو ده، څه موده وړاندې په بغلان کې هم د اربکیانو له لورې له ولسي وګړو سره ورته ناوړه چلند شوی وو.